Mańǵystaýda qoqıqazdardyń neden qyrylǵany belgili boldy

ASTANA. QazAqparat - Orman sharýashylyǵy jáne janýarlar álemi komıteti Mańǵystaýdaǵy qoqıqaz ólimi boıynsha málimdeme jasady, dep habarlaıdy QazAqparat.

Aıta keteıik, 19 sáýir kúni Mańǵystaý oblysy Beıneý aýdany Sam aýylynda qoqıqazdardyń ólimine qatysty aqparat taraǵan.

Oqıǵa ornyna aýdandyq veterenarııa stantsııa qyzmetkeri, Sam aýylynyń ákimi, Sam orman jáne janýarlar dúnıesin qorǵaý mekemesiniń dırektorynyń orynbasary bardy.

Atalǵan aýmaqtan 4 qoqıqazdyń óleksesi tabyldy.

Aıta ketý kerek, Beıneý aýdanynyń aýmaǵy qustardyń maýsymdyq mıgratsııa jolyna kiredi.

«Sońǵy ýaqytta aýdan aýmaǵynda aýa raıynyń qolaısyz jaǵdaıy tirkelgen – jel jyldamdyǵy 15-20 m/s jetip, shańdy daýyl soqty. Aldyn ala boljam boıynsha, qustar joǵary kerneýli elektr symdaryna soǵylyp, bul olardyń ólimine ákelgen bolýy múmkin» dep habarlady komıtettiń baspasóz qyzmeti.

Qustardyń óleksesin veterınarııa mamandary Beıneý aýdandyq veterınarlyq laboratorııaǵa tekserýge aldy.