Mańǵystaýda arqar atqan polıtseıler jumystan bosatyldy
Zańdy belshesinen basqandardyń jumystan shyǵarylǵandyǵy týraly Mańǵystaý oblysynyń Polıtsııa departamentiniń basshysy Janarbek Baqtybaev málim etti, dep habarlaıdy QazAqparat tilshisi.
Álemjelide jeldeı esken kadrlar kóptiń jaǵasyn ustatty. Taspada qaskóıler tabıǵat qorǵaýshylaryn kóre sala, qasha jónelgen. Keıin anyqtalǵandaı bet-júzin búrkegen tórt brakonerdiń ekeýi polıtsııa qyzmetkeri bolyp shyqty. Qazir arqar atqan ańshylar ustaldy.
«Shetpe aýylynyń tórt azamaty, árqaısynyń qolynda bir-birden myltyq bolǵan. Kólikti tekserý, qarý-jaraqty alý, oljalaǵan ónimniń hattamasy toltyrylyp, Mańǵystaý aýdanynyń polıtsııa bólimine tapsyryldy. Іshinde eki polıtsııa qyzmetkeri bar ekeni belgili boldy.
Tabıǵat qorǵaýshylarynyń málimetinshe, zańsyz ań aýlaýǵa shyqqan tártip saqshylary ınspektorlardy sózge tartyp, jazadan qutylyp ketýge árekettengen», - dedi, «Qyzylsaı» memlekettik óńirlik tabıǵı parkiniń dırektory Omar Sársenǵazıev.
Qaskóıler erekshe qorǵalatyn «Qyzylsaı» tabıǵı parkiniń aýmaǵynda kólikpen emin-erkin júrgen. Tabıǵat qorǵaýshylary brakonerlerdi 100 shaqyrymdaı qýyp júrip ustaǵan. Mamandardyń aıtýynsha, kólikten tórt ańshy myltyǵy men jabaıy ańnyń eti tárkilengen. Qazir qyzyl kitapqa engen túz taǵysyn atqandarǵa qatysty qylmystyq is qozǵaldy.