Mańǵystaýda Altyn Orda dáýirindegi eskertkishti lastaǵandar jazaǵa tartylady

AQTAÝ. QazAqparat – Mańǵystaý oblysyndaǵy Ketikqala tarıhı qalashyǵy shashylǵan qoqys saldarynan adam tanymastaı ózgerip ketken. Arheolog Andreı Astafev Altyn Orda kezeńindegi tarıhı orynnyń saqtalýy jaǵdaıyna sholý jasady. Osy oraıda ol óziniń You-Tube-arnasynda eskertkishtiń qazirgi jaǵdaıyn kórsetti, dep habarlaıdy QazAqparat tilshisi.

Qazirgi kezde tarıhı ári mádenı eskertkishterdiń memlekettik tiziminde 590 eskertkish bar, ıaǵnı onyń 570-i jergilikti jáne 20-sy respýblıkalyq mańyzda. Ketikqala qalashyǵy arheologııalyq eskertkish sanatyna engen.

2021 jyldyń 28 sáýirinde zańnama talaptaryna sáıkes Fort-Shevchenko qalasy ákimdigi men Mańǵystaý oblysy Mádenıet, arhıvter jáne qujattama basqarmasy arasynda eskertkishti qorǵaý týraly mindetteme bekitilgen.

Qujatqa sáıkes Fort-Shevchenko ákimdigi sanıtarlyq-epıdemıologııalyq normalardy saqtaýǵa mindetti sanalady. Bul turǵyda atalǵan másele boıynsha osy qalanyń ákimi apparatyna tıisti hat joldandy. Sonymen qatar ákimdik tarıhı eskertkishter aýmaǵyn tazartýǵa arnalǵan senbilikter ótkizip keledi.

Alaıda zańnamada ejelgi qalashyqtar aýmaǵyna barýdy retteıtin erejeler eskerilmegen. Mańǵystaý oblysynyń mádenıet basqarmasy Ketikqala aýmaǵyn lastaǵan adamdar anyqtalǵannan keıin, olar jaýapkershilikke tartylatynyn málimdedi. Osy oraıda basqarma qyzmetkerleri tıisti jumystarǵa kirisip ketken.

Mańǵystaý memlekettik tarıhı-mádenı qoryǵy eskertkishterdiń saqtaýly jaǵdaıyna jyl saıyn monıtorıng júrgizedi. Onyń qorytyndysy boıynsha tarıhı eskertkishterdi saqtaý úshin tıisti usynystar engiziledi.

Budan buryn habarlanǵandaı, Mańǵystaýdyń tarıhyn júıeleýge sheteldik ǵalymdardyń qatysýymen keshendi ǵylymı zertteýler, halyqaralyq deńgeıdegi ekspedıtsııalar uıymdastyrylatyny jazylǵan edi.