Mańǵystaýda alǵash ret balyq óndirisi mamandyǵy ashyldy
2016 jyly jumysyn bastaǵan kolledj 263 stýdentke 8 mamandyq, 12 biliktilik boıynsha bilim beredi.
«Túpqaraǵan aýdany men aýyl turǵyndarynyń ótinishi boıynsha jáne jergilikti halyqty jumyspen qamtý maqsatynda balyq óndirisi mamandyǵyn ashtyq. Balyq óndirisinde kóbinese shetel azamattary jumys istegendikten tapshy mamandyqty óńir jastaryna úıretip, bolashaqta myqty maman bolyp shyǵýyna jaǵdaı jasaǵymyz keledi. Básekege qabiletti, bilikti mamandardy daıarlaý – búgingi kúnniń basty talaby. Sondyqtan jańashyl mamandardy daıarlaý barysynda kásibı baǵyttylyǵyna basa nazar aýdaýymyz qajet», - dedi «Túpqaraǵan gýmanıtarlyq-kásiptik» kolledjiniń dırektory Aınur Sultanǵalı.
Sondaı-aq jańa oqý jylynda «Balyq jáne teńiz ónimderin óńdeýshi», «Tehnık-tehnolog» biliktiligi boıynsha 20 stýdent memlekettik tapsyryspen tegin túrde bilim alyp, shákirtaqymen qamtamasyz etiledi dep josparlanyp otyr. Balyq óndirisi mamandyǵy boıynsha bilim alatyndar úshin oqý kabıneti men sheberhana jasaqtalǵan. Stýdentter jańa mamandyqtyń arnaıy kitaptarymen de qamtamasyz etilgen.
«Bilim alýshylar kásiptik tájirıbeden Túpqaraǵan aýdany Atash eldi mekeninde, «Atash Fısh Prom» JShS mekemesinde ótetin bolady. Sonymen qatar, mekeme usynysy boıynsha maqsatty memlekettik tapsyrysqa 4 oryn usynyp otyr», - dedi Aınur Sultanǵalı.
Aıta keteıik, balyq óndirisi mamandyǵyna qujattardy qabyldaý 26 maýsymda bastalyp, 18 tamyz kúni aıaqtalady.