Mańǵystaý turǵyndary tasattyq jasady

NUR-SULTAN. QazAqparat - Búgin mańǵystaýlyqtar Táńirden jańbyr tilep, teńiz jaǵasynda tasattyq jasaýǵa jınaldy, dep habarlaıdy QazAqparat óńirlik kommýnıkatsııalar qyzmetine silteme jasap.

Jaýyn tileýge Aqtaý qalasyndaǵy Amfıteatr alańyna 3 myńnan astam adam jınaldy. Oblystyq «Beket ata» meshitiniń bas ımamy Ánýar Eljanov jınalǵandarǵa jańbyr tileý namazynyń mán-maǵynasyn túsindirip ótti.

Buǵan deıin Ánýar Eljanov turǵyndardy Mańǵystaý óńiri úshin Alladan jalbarynyp jaýyn tilep, Paıǵambarymyz Muhammed (oǵan Allanyń salaýaty men sálemi bolsyn) úıretkendeı, arnaıy duǵa jasaýǵa shaqyrǵan bolatyn.

Eske sala keteıik, ótken jyly Mańǵystaý oblysynda qurǵaqshylyq kúsheıip, sharýa qojalyqtaryna qatty áser etken bolatyn.

QR Prezıdenti Qasym-Jomart Toqaev Sybaılas jemqorlyqqa qarsy is-qımyl máseleleri jóninde keńeste qýańshylyq kezinde aýyl turǵyndaryna ne qajet ekenine eshkim bas qatyrmaǵanyn basa aıtqan edi.

Naýryz aıynda ótken Úkimet otyrysynda QR Aýyl sharýashylyǵy mınıstri Erbol Qarashókeev bergen málimetke sáıkes, qýańshylyqqa qarsy sharalarǵa 20 mlrd teńge bólinýi múmkin.