Mańǵystaý óńirinde 26 adam vırýsty gepatıt juqtyrdy

AQTAÝ. QazAqparat – Mańǵystaý oblysynda jyl basynan jiti vırýsty «A» gepatıtke 25 adam, «V» gepatıtine 1 adam shaldyqqan. Bul týraly Qoǵamdyq kommýnıkatsııa ortalyǵynda ótken brıfıngide óńirlik Sanıtarııalyq-epıdemıologııalyq baqylaý departamentiniń bas mamany Gúlfara Karımova málim etti, dep habarlaıdy QazAqparat tilshisi.

Bıyl tirkelgen naýqastar sany ótken jylmen salystyrǵanda artqan. Bıyl 26 naýqas tirkelse, 2022 jyldyń alty aıynda vırýsty gepatıtpen 5 adam (gepatıttiń «A» túrimen—4, gepatıttiń «V» túrimen – 1) aýyrǵan.

«Vırýsty gepatıt –túrli qozdyrǵyshtary óte keń taralǵan, baýyrdy zaqymdaıtyn juqpaly aýrýlar toby. Álemde vırýsty gepatıtterdiń 19 túri belgili, Mańǵystaý oblysynda 5 túri kezdesedi, olar – A, V ,S, D jáne E. Sonyń ishinde, «A» jáne «E» gepatıtteriniń aldyn alý úshin qarapaıym tazalyq tártibin jáne jeke bas gıgıenasyn, tamaqtaný gıgıenasyn, turmystyq gıgıenany saqtaý qajet», - dedi Gúlfara Karımova.

Sondaı-aq brıfıngide Mańǵystaý oblystyq Densaýlyq saqtaý basqarmasy basshysynyń orynbasary Bıbizada Dúısenbaeva «A» vırýsty gepatıtiniń taralý sebebi, klınıkasy men aldyn alý sharalaryna toqtala otyryp, aýrýdan saqtanýdyń eń basty joly ekpe alý ekenin aıtyp ótti.

«Oblys kóleminde «A» vırýsty gepatıtiniń aýrýshańdyq kórsetkishi 100 myń turǵynǵa shaqqanda 3,32% qurasa, al respýblıkalyq kórsetkish 4,14% bolyp otyr. Byltyrǵy jylmen salystyrǵanda ósim bolýyna baılanysty oblys kóleminde vaktsınatsııa jumysy kúsheıtildi»- dedi Bıbizada Dúısenbaeva.