Mańǵystaý oblysynyń turǵynynan 500 kelideı bekire tuqymdas balyq tárkilendi

MAŃǴYSTAÝ OBLYSY. QazAqparat - Mańǵystaý oblysynyń polıtsııa qyzmetkerleri brakonerlik faktini anyqtady, dep habarlaıdy QazAqparat Polisia.kz saıtyna silteme jasap.

«Tabıǵatty qorǵaý polıtsııasy reıdtik sharalar júrgizý barysynda Fort-Shevchenko qalasy turǵynynyń garajynan jalpy salmaǵy 500 keliden asatyn bekire tuqymdas 219 balyq tárkiledi», - delingen habarlamada.

Qazirgi ýaqytta QR QK «Sırek kezdesetin jáne quryp ketý qaýpi bar, sondaı-aq paıdalanýǵa tyıym salynǵan ósimdikter men janýarlar túrlerimen zańsyz aınalysý» baby boıynsha sotqa deıingi tergeý bastaldy.

Dúnıejúzilik jabaıy tabıǵat qorynyń málimetinshe, Kaspıı teńizindegi bekiretuqymdas balyqtar joıylý qaýpi aldynda tur. Buǵan ákep soqtyrǵan negizgi sebep - brakonerlik.