Mańǵystaý oblysynyń ákimdigi 8 sý tuşytý zaýytyn salýdy josparlap otyr

NUR-SULTAN. QazAqparat – Búgin Májilistegi parlamenttik tyńdaýda Indýstrııa jáne ınfraqurylymdyq damý mınıstri Qaıyrbek Óskenbaev Mańǵystaý oblysyn aýyz sýmen qamtamasyz etýdegi máseleni aıtty, dep habarlaıdy QazAqparat tilshisi.

«Halyqty aýyz sýmen qamtamasyz etýde óz sheshimin talap etetin birqatar problemalar bar. Aýyldardy aýyzsýmen qamtamasyz etý boıynsha kóshbasshylardyń biri - Mańǵystaý oblysy. Biraq tuşy sý kózderiniń tapshylyǵyna baılanysty (ásirese, jazda) halyqqa sý keste boıynsha beriledi. Qazirgi kezde óńir negizinen «Astrahan-Mańǵyshlaq» sý qubyry jáne tuşylandyrylǵan teńiz sýy arqyly qamtamasyz etiledi. Olardyń jıyntyq qýaty táýligine 150 myń tekshe metrdi quraıdy. Jazǵy kezeńde táýligine 51 myń tekshe metr aýyz sý tapshylyǵy bolady. Óńirdiń damý deńgeıin eskersek, tapshylyq 2025 jylǵa qaraı táýligine 110 myń tekshe metrdi quraýy múmkin», - dedi Q.Óskenbaev.

Onyń aıtýynsha, atalǵan problemany sheshý maqsatynda Mańǵystaý oblysynyń ákimdigi 8 sý tuşytý zaýytyn salýdy josparlap otyr.

«Bul maqsatqa oblysty áleýmettik-ekonomıkalyq damytýdyń 2021-2025 jyldarǵa arnalǵan keshendi jospary aıasynda qarjylandyrýdyń barlyq kózderinen 232 mlrd teńge qarastyrylǵan», - dedi mınıstr.

Budan buryn habarlanǵandaı, 2040 jylǵa qaraı Qazaqstanda sý tutyný deńgeıi 46 paıyzǵa artýy múmkin.

Aýyldardy aýyz sýmen qamtýdyń eń tómengi deńgeıi Qostanaı (74,9%) jáne Soltústik Qazaqstan oblystarynda (83,5%) tirkeldi .