Mańǵystaý oblysynda 1,7 myńdaı oqýshysy bar mektep ujymy tolyq vaktsına aldy
Aqshuqyr mektep-lıtseıiniń dırektory Qalamqas Tileýbaeva koronavırýsty toqtatýdyń jalǵyz joly – vaktsına alý ekendigine senimdi. Mekteptegi ustazdar vaktsına alýdy sáýir aıynda bastap ketken. Sońǵy pedagog bir apta buryn vaktsınanyń birinshi kompenentin qabyldaǵan. Qazir ujymda 158 muǵalim jáne 42 kishi qyzmetker bar.
«Ujymynyń 98 paıyzy, ıaǵnı túgelge jýyǵy deýge bolady vaktsına aldy. Oǵan 2020-2021 jylǵy oqý jylynda koroanvırýs indetine baılanysty oqýshylarymyzdyń dástúrli oqý formatyna kóshe almaýy sebepshi boldy. Onlaın rejimde oqyǵan oqýshylardyń bilim sapasynyń tómendep ketýi ata-analardyń, muǵalimderdi, oqýshylardy oılantty. Oqý jylynyń ekinshi jartyjyldyǵynda onlaın rejimge qosymsha aralas formatta tájirıbe jasap kórdik. Sonda oqýshylardyń bilim sapasynyń óte álsirep ketýi bizdi qynjyltty. Bıylǵy jańa 2021-2022 jylǵy oqý jylyn dástúrli oqý formatyna kóshýge ujymnyń belsendiliginiń arqasynda tolyqtaı vaktsına saldyrttyq», - deıdi ol.
Aıta keterligi, Memleket basshysy Qasym-Jomart Toqaev 10 shildede Úkimettiń keńeıtilgen otyrysynda Úkimetke jańa oqý jylynda oqýshylar men stýdentterdiń dástúrli oqý júıesine oralýyn qamtamasyz etýdi tapsyrǵan bolatyn.
Qalamqas Tileýbaeva jańa oqý jylynda dástúrli formatqa kóshý úshin ujymdyq ımmýnıtetti qalyptastyryp daıyn otyrǵanyn jetkizdi.
«Ujym arasynda tek qana vaktsınatsııa týraly jalpy túsindirý ǵana júrgizildi, biraq soǵan qaramasta muǵalimder sanaly túrde óz erkimen ekpe saldyrdy. Ekpe alýǵa jatpaıtyn 3 muǵalim densaýlyǵyna baılanysty komıssııa anyqtamasyn usyndy. Qalǵan 12 muǵalim aldaǵy ýaqytta dekrettik demalysqa shyǵýdy josparlap otyr», - deıdi ol.
Aqshuqyr kentinde 10 myńnan astam turǵyn turady, aýylda úsh mektep ornalasqan. Mektep-lıtseıde bıylǵy oqý jylynda 1700-ge jýyq oqýshy bilim alǵan.
Qalamqas Tileýbaeva áriptesterin ózderi sekildi jappaı vaktsına alýǵa shaqyrdy.
«Mektep ujymdarynyń basshylaryna, áriptesterime qazirgi epıdemıologııalyq jaǵdaıdy túsine otyryp, sanaly túrde vaktsına alýǵa shaqyramyn! Bizdiń mekteptiń ujymynyń tájirıbesine qaraı otyryp, basqa ujymdarda da osyndaı jaǵdaı qalyptastyra alamyz deı oılaımyn», - dedi ol.
Onyń aıtýynsha, bul qyzmetine degen jaýapkershilik.
«Bizge ata-analar senim artyp, balalaryn senip tapsyryp otyr. Sondyqtan oqý salasynda olqylyqtarǵa jol bermeýge tıispiz. Ár pedagog birinshi óz densaýlyǵyn oılaýy tıis. Sonymen qatar balalardyń qaýipsizdigi basty orynda. Árbir ujym múshesi sanaly túrde túsinýi kerek. «Kemedeginiń jany bir» deıdi halqymyz. Pedagogtiń basty mindeti bilim berý, oqýshyǵa tálim-tárbıe berý. Bul ustaz ben oqýshynyń arasynda betpe-bet júrgiziletin úrdis. Soǵan tezirek oralaıyq», - deıdi Qalamqas Tileýbaeva.
Atalmysh mekteptiń tarıh jáne quqyq pánderiniń ustazy Álııa Kabırova HayatVac vaktsınasyn saldyrǵan.
«Dárigerlerdiń aıtýynsha COVID-19-ben kúrestiń basty joly – vaktsına alý dep otyr. Men soǵan senemin. Ózim ekpe alǵanda janama áserleri bolmady. Áleýmettik jelide vaktsınaǵa qatysty keraǵar pikirler az emes. Men ony qate dep sanaımyn. Árbir azamat ekpe alýdyń durys ekenin sanaly túrde uǵynýy tıis», - deıdi Álııa Kabırova.
Onyń aıtýynsha erte kezderi sheshek jaılaǵan jyldary kóptegen adam indetten kóz jumǵan. Sol kezderi qazirgi medıtsına jáne tehnologııa bolmaǵan.
«Qazir vaktsına jedel ázirlenip, memleket tarapynan pandemııadan qorǵanýǵa jaǵdaı jasalynyp otyr. Tegin ekpe alýǵa múmkindik týdy. Nege sony paıtsdalanbasqa?!», - deıdi ol.
Osy mektepte qazaq tili páninen sabaq beretin Marat Qanı aýylda vaktsına pýnkti ashylsa salysymen alǵashqylardyń biri bolyp baryp ekpe egilgen.
«Onyń aldynda vaktsına týraly málimetterdi oqyp, zerttedim. Sáýir aıynda qazirgideı tańdaý bolmady, tek reseılik «Spýtnık V» vaktsınasy usynyldy, sony saldyrdym. Eskertýdegi janama áselerdiń birazy boldy. Bastapqy bir aptada álsizdik sezindim. Ekinshi kompenentti saldyrǵanda eshteńe sezilmedi», - deıdi ol.
Onyń pikirinshe qoǵamda qaıshylyqtyń, qarsy pikirdiń bolýy zańdylyq. «Bireýler vaktsınany qoldaıdy, bireýler senimsizdik tanytady. Biz bilim oshaǵynda júrgendikten mindetti túrde vaktsınany alýymyz kerek. Óıtkeni 1,5 jyl buryn oqýshylarǵa qashyqtan bilim berdik. Aldaǵy jyldary da onlaın sabaq jalǵasatyn bolsa, bilim sapasy tómendep kete me degen qaýpim bar. Sondyqtan pedagogter qaýymy tolyqtaı vaktsına alyp, dástúrli formatty bilim berýge kóshýimiz kerek», - deıdi ol Marat Qanı.
Sýretterdi túsirgen Talant Qusaıyn