Mańǵystaý atom energetıka kombınatyndaǵy apat sebebi jarııalandy

AQTAÝ. QazAqparat – 3 shildede Mańǵystaý atom energetıka kombınatynyń (MAEK) elektr stantsııasynda bolǵan apatty toqtaýdyń sebebi anyqtaldy, dep habarlaıdy QazAqparat «KEGOC» AQ-ǵa silteme jasap.

«3 shilde kúni MAEK JES iri blogynyń ajyratylýyna óndirýshi jabdyqtyń tozýy sebep bolǵan. Kompanııa atap ótkendeı, «KEGOC» AQ-nyń relelik qorǵaý jáne apatqa qarsy avtomatıkasy shtattyq rejımde iske qosyldy. Bul Atyraý jáne Mańǵystaý energııa toraptarynyń tolyq óshýine jol bermedi.

«KEGOC» AQ qyzmetkerleriniń úılesimdi is-qımyly qysqa merzimde jumys shemasyn qalpyna keltirýge múmkindik berdi. Bir saǵattan az ýaqyt ishinde Atyraý energııa toraby, sál keıinirek Mańǵystaý toraby Qazaqstannyń Biryńǵaı energetıka júıesiniń Batys aımaǵymen sınhrondaldy.

Apattyq jaǵdaıdy taldaý kórsetkendeı, jumys istep turǵan elektr stantsııalaryn jańǵyrtý jáne rekonstrýktsııalaý qajet, Atyraý munaı óńdeý zaýytyn syrtqy elektrmen jabdyqtaýdy kúsheıtý jáne jańa zamanaýı energııa kózderin salý kerek», - dep tolyqtyrdy kompanııa.

Málim etilgendeı, «Samuryq-Qazyna» AQ KEGOC kompanııasynyń uzyndyǵy 770 shaqyrym bolatyn 220 kV áýe jelisin salý, qoldanystaǵy 220 kV qosalqy stantsııalardy keńeıtý jáne 220 kV taratý qosalqy stantsııasyn salý arqyly Batys energetıkalyq aımaqtyń elektr jelisin kúsheıtý jobasyn aıaqtaýdy baqylaýda ustap otyr. Joba bıylǵy jeltoqsan aıynda tolyq aıaqtalmaq. Nátıjesinde tranzıttiń ótkizý qabileti «Oral-Atyraý» ýchaskesinde – eki esege, «Atyraý-Mańǵystaý» ýchaskesinde – tórt esege ulǵaıady, bul batys aımaq tutynýshylaryn elektrmen jabdyqtaý senimdiligin aıtarlyqtaı kúsheıtedi.

Osyǵan deıin Mańǵystaý atom energetıka kombınatynyń №1 energııa blogy apatty jaǵdaıda ajyratylǵany habarlanǵan edi.