Mańǵystaý ańyzdary birneshe tilde kitap bolyp shyqty

ASTANA. QazAqparat - «Bolashaqqa baǵdar: rýhanı jańǵyrý» baǵdarlamasy aıasynda «Mańǵystaý ańyzdary» atty kitap jaryq kórdi. Bul týraly búgin Ortalyq kommýnıkatsııalar qyzmetindegi baspasóz máslıhatynda Mańǵystaý oblysynyń ákimi Eraly Toǵjanov aıtty, dep habarlaıdy QazAqparat.

Onyń aıtýynsha, kitap qazaq, orys, aǵylshyn, qytaı tilinde 1000 danamen jaryq kórgen. Onda kıeli Mańǵystaý óńirine qatysy bar 100 ańyz toptastyrylǵan.

«Atalǵan eńbektiń birneshe tilde jaryq kórýiniń basty maqsaty - Elbasymyzdyń úsh tildilik saıasatyn qoldaý jáne Mańǵystaýdyń kóne ári baı tarıhy men mádenıetin, qasıetti jerleri men ózine tán erekshe tabıǵatyn sýrettep, álemdik dárejede nasıhattaý», - dedi oblys ákimi.

Jalpy Eraly Toǵjanovtyń aıtýynsha, Mańǵystaý  óńirinde rýhanı jańǵyrý aıasynda 120-dan astam shara ótkizildi. Oǵan jergilikti qaltaly azamattar 11 mlrd teńgeden astam somaǵa qoldaý kórsetti.

«Mektepterdi, aýrýhanalardy qajetti qural-jabdyqtarmen, kólikpen qamtamasyz etýge metsanattar jumsaǵan qarjynyń kólemi 673 mıllıon teńgege jetip otyr. Qazaqstandaǵy jer kólemi eń úlken Qaraqııa  aýdanynda 500 oryndyq 2 jataqhana metsanattar kómegimen salyndy. Jumsalǵan qarjy 2 mlrd 112 mln teńgeni quraıdy», - dedi ol.