Mańǵystaýlyq velosportshylar el chempıony atandy
AQTAÝ. KAZINFORM – Astana qalasynda velotrekten erler jáne áıelder arasynda ótken qysqy el birinshiliginde Dmıtrıı Noskov pen Sergeı Ponomarev QR chempıondary atandy.
Mańǵystaý oblystyq sport basqarmasy 6-11 aqpan aralyǵynda Astana qalasynda velotrekten erler jáne áıelder arasynda qysqy el chempıonatynda mańǵystaýlyqtar 2 altyn, 2 kúmis, 2 qola júlde ıelengenin málimdedi. Birinshilikke elimizdiń 16 oblystan 225 sportshy baq synady.
Olardyń qatarynda komandalyq ýaqytqa jarysqa shyqqan Dmıtrıı Noskov 1-oryn, Sergeı Ponomarev keırın baǵdarlamasy boıynsha 1-oryn, Ramazan Muhtar gıt 1000 metr baǵdarlamasy boıynsha 2-oryn ıelendi. Qola júldege keırın baǵdarlamasynda baq synaǵan Vıktor Golov pen sprınt baǵdarlamasynda Ramazan Muhtar qol jetkizdi.
Sondaı-aq, mańǵystaýlyq sportshylar Vıktor Golov, Ramazan Muhtar, Sergeı Ponomarev komandalyq sprınt baǵdarlamasynda óner kórsetip kúmis medal ıegeri atandy.
«2024 jyldyń birinshi jarysyn oıdaǵydaı bastadyq. Keırın jarysyn utý biz úshin mańyzdy boldy, sebebi bul - Parıjde ótetin 2024 Olımpıada oıyndaryna irikteý kezenderiniń biri. Ramazan Muhtar, Dmıtrıı Noskov, Sergeı Ponomarev 21-26 aqpanda Úndistan memleketinde ótetin Azııa Chempıonatyna joldama utyp alyp, Ulttyq qurama sapynda óner kórsetedi. Olımpıadalyq lıtsenzııa utyp alýǵa kómektesetin biz úshin mańyzdy upaılar osy Azııa Chempıonatynda sarapqa salynady» - dedi velosporttan oblystyń aǵa jattyqtyrýshysy Januıa Seıitova.
Qazaqstan chempıonatynyń qorytyndysy boıynsha mańǵystaýlyq veloshabandozdar erler arasynda óńir quramasy komandalyq 2-orynǵa turaqtady. 15-16 jas aralyǵynda uldar jáne jasóspirim qyzdar el birinshiligi men velosporttan respýblıkalyq jarysta baq synap, mańǵystaýlyq Ádilhan Shamyran skretch baǵdarlamasynda kúmis júldeger atandy.
