Mańǵystaýlyq pedagog qazaqtyń irimshiginen balmuzdaq jasady
ASTANA. KAZINFORM - TurkicSkills-2025 chempıonaty aıasynda ótken halyqaralyq «Caspian» festıvaliniń kórmesinde Mańǵystaý týrızm kolledjiniń óndiristik oqý sheberi Nuraı Elaman óz avtorlyq taǵamyn tanystyrdy.
Oqý-aǵartý mınıstrligi málimetinshe, onyń irimshik negizinde daıyndalǵan erekshe balmuzdaǵy búginde suranysqa ıe ónimge aınalǵan. Ulttyq dástúr men zamanaýı tehnologııany ushtastyrǵan bul desert kórme qonaqtarynyń úlken qyzyǵýshylyǵyn týdyrdy.
— TurkicSkills-2025 tehnıkalyq jáne kásiptik bilim berý júıesi qatysýshylary úshin zor múmkindikter alańyna aınaldy. Munda qatysýshylar ózderiniń úzdik jobalary men jetistikterin tanystyryp qana qoımaı, tájirıbe jáne bilim almasýǵa da biregeı múmkindik aldy, – dedi QR Oqý-aǵartý mınıstrliginiń Tehnıkalyq jáne kásiptik bilim departamenti dırektorynyń orynbasary Aqzıra Qasymova.
Kórme aıasynda Mańǵystaý óńiriniń gastronomııalyq erekshelikteri, shubattan jasalǵan kokteılder, jantaqpen qaınatylǵan shaı, talqannan jasalǵan makaron ónimderi, qurt pen shokoladtyń úılesimi, jent qosylǵan táttiler, túıe sútinen daıyndalǵan balmuzdaq, sary qant sekildi ulttyq taǵamdardyń zamanaýı ınterpretatsııalary keńinen usynyldy. Sondaı-aq, kórmede týrızm salasyndaǵy stýdentterdiń startap jobalary da tanystyryldy.
Aıta keteıik, kásibı sheberlikke arnalǵan halyqaralyq TurkicSkills-2025 chempıonaty Aqtaý qalasynda ótip jatyr.
Іs-shara Jumysshy mamandyqtar jyly aıasynda uıymdastyrylǵan.
Chempıonatqa 16 men 22 jas aralyǵyndaǵy 70-ke jýyq stýdent pen jas maman, sondaı-aq Qazaqstan, Túrkııa, Ázerbaıjan, Vengrııa, Ózbekstan jáne Qyrǵyzstan elderinen kelgen 90-ǵa jýyq joǵary bilikti sarapshy qatysyp jatyr.
Іs-sharany Oqý-aǵartý mınıstrligi uıymdastyrady. Jobany júzege asyrýshylar – QR OM janyndaǵy «Talap» KEAQ jáne Mańǵystaý oblysy ákimdigi.
Aıta keteıik, otandyq irimshik óndirýshiler Frantsııadada ótken baıqaýda top jardy.
Qazaqstanda irimshik pen súzbe baǵasy qansha turatynyn jazǵan bolatynbyz.