Mańǵystaýdaǵy volonterlik toptar men uıymdarǵa 15 shaǵyn grant beriledi

Mańǵystaý oblysyndaǵy volonterlik toptar men uıymdarǵa bıyl 300 000 teńge kóleminde 15 shaǵyn grant beriledi, dep habarlaıdy Kazinform.

Shaǵyn grant berý úshin úzdik volonterlik jobany anyqtaý maqsatynda búginde 38 ótinim túsip, tehnıkalyq irikteý kezeńi bastalǵan.

"Qazirgi tańda óńirimizde volonterlikpen 53 bastamashyl top, 10 úkimettik emes uıym qyzmet atqarady. Oblysta barlyǵy 5230 volonter bar. Jyl basynan beri birqatar volonterlik uıymdardyń uıymdastyrýymen óńirde ekologııalyq aktsııalar ótip, áleýmettik jaǵynan az qamtylǵan otbasylarǵa, jalǵyzbasty analarǵa, qart adamdarǵa materıaldyq, psıhologııalyq turǵydan kómek kórsetildi", - dedi Mańǵystaý oblystyq jastar saıasaty máseleleri jónindegi basqarma basshysy Muqash Oralbaı.

Sondaı-aq volonterlikti memlekettik qoldaý standartyn engizý maqsatynda 17 oblysta jáne respýblıkalyq mańyzy bar 3 qalada is-sharalar men kezdesýler ótkizý bastalǵan.

"Atalǵan is-shara barysynda volonterlikti damytýǵa yqpal etetin tabysty tájirıbeler men jobalardy anyqtaý, aımaqtardaǵy volonterlik saladaǵy bar problemalar men qajettilikterdi taldaý, sonymen qatar, úkimettik emes uıymdar, volonterler toptary men jergilikti atqarýshy organdar arasyndaǵy yntymaqtastyqtyń yqtımal joldaryn talqylaý jáne 2024-2027 jyldarǵa arnalǵan volonterlikti damytýdyń jol kartasyna aqparat jınaý syndy taqyryptar talqylanatyn bolady", - dedi «Ulttyq volonterlik jelisi» ZTB óńirlermen ózara is-qımyl jónindegi baǵyttyń basshysy Aqerke Qusanova.