Mańǵystaýdaǵy bir mektepte 40 er muǵalim qyzmet etedi
Mańǵystaý oblysy Túpqaraǵan aýdanyna qarasty Aqshuqyr aýylyndaǵy mektep-lıtseıde 40 er muǵalim qyzmet etedi. Byltyr bilim ordasynda 36 er muǵalim bolsa, bıyl olardyń qatary 40-qa jetken, dep habarlaıdy QazAqparat tilshisi.
Aqshuqyr mektep-lıtseıi 2014 jyly 14 qarashada óńirdegi úsh aýysymdy oqytý máselesin joıý maqsatynda ashylǵan. Búgingi tańda 1700 oqýshy bilim alady. Mektep-lıtseıde 137 muǵalim qyzmet etedi.
Bilim ordasy ashylǵanda onda 7 er muǵalim bolǵan jáne olardyń kóbi dene tárbıesinen sabaq bergen. 9 jylda aǵaılardyń qatary 40-qa jetken.
Olardyń aldy óz isiniń maıtalmany, keıingisi – teorııasy men praktıkasyn ushtastyryp, izdenis jolynda júrgen jas býyn. Er muǵalimder qazaq tili, tarıh, geografııa, aǵylshyn tili, mýzyka, kórkem eńbek, dene shynyqtyrý, matematıka, fızıka, ınformatıka pánderinen sabaq beredi.
"Bizdiń mektep-lıtseıdiń kadrlyq quramy jaǵynan respýblıkalyq mektepterden edáýir aıyrmashylyǵy bar. Óıtkeni ujymda 40 er muǵalim qyzmet etedi. Olardyń ekeýi - sheber-pedagog, úsheýi - zertteýshi pedagog, beseýi - sarapshy pedagog, segizi - moderator-pedagog qyzmet sapynda. Er muǵalimderdiń jeteýi – óz túlegimiz ári oqý úzdikteri", - dedi mektep dırektory Qalamqas Tileýbaeva.
20 jylǵa jýyq eńbek ótili bar tarıh pániniń muǵalimi Baýyrjan Aımanov osy bilim oshaǵynda 6 jyldan beri qyzmet etedi. Ol tarıh páninen «Úzdik pedagog-2021» konkýrsynyń jeńimpazy, birneshe ret pándik olımpıadanyń respýblıkalyq kezeńiniń jeńimpazdaryn daıyndaǵan.
Qazir saıası qýǵyn-súrgin qurbandaryn aqtaý komıssııasynyń quramynda muraǵat aqtaryp, ulttyń joǵyn túgendep júrgen ustaz. Baýyrjan oqý ordasynda er muǵalimderdiń kóp bolýy tárbıe protsesinde oń yqpalyn tıgizetinin aıtady.
"Bilim salasyndaǵy reformalar, muǵalimderge degen qurmet, ustazdarǵa qoǵamdaǵy oń kózqaras, pedagog mártebesi zańynyń qabyldanýy, muǵalimderge jasalyp jatqan áleýmettik qoldaýlar, jalaqynyń kóbeıýi - osynyń barlyǵy qazirgi tańda bilim salasynda er muǵalimderdiń kóbeıýine óziniń áserin tıgizip jatyr dep oılaımyn. Oqýshylarǵa er muǵalimderdiń negizgi pánnen sabaq berýi de ul balalardyń muǵalimdikke kelýine betburys jasap otyr", — dedi tarıh pániniń muǵalimi, pedagog-sheber Baýyrjan Aımanov.
Al 21 jastaǵy Asylzat Mádıuly – mektep-lıtseıge bıyl jumysqa ornlasqan jas maman. Ol oqýshylarǵa qazaq tili men ádebıeti páninen sabaq beredi.
«Ustaz degen ulǵatty esimdi arqalaý - úlken jaýapkershilik. Biz qazaq jastarynyń ádebıetke kóbirek nazar salyp, bet burǵanyn qalaımyz. Óz mamandyǵymyzdy tańdap, osyndaǵy aldyńǵy býyn aǵalarymyzdyń artyn qýyp, osy bilim ordasynan eńbek jolymyzdy bastap jatyrmyz", — dedi Asylzat Mádıuly.
Mektep basshysy er muǵalimderdiń kóptigi oqýshylardyń patrıot, ultjandy bolýyna yqpal etetin aıtady.
"Qazir qoǵamdaǵy keleńsiz jaǵdaılardyń aldyn alý úshin mektepte er- azamattardyń ustazdyq etýi mańyzdy. Er ustazdardyń mektepke kóptep kelýi «Dıplommen aýylǵa» baǵdarlamasymen berilgen jeńildikterdiń de arqasy ekenin aıta ketý kerek. Al bizdiń mektep-lıtseıge jumysqa kelýin aıtatyn bolsaq, jalpy ózimiz myqty mamandardy zerttep, zerdeleı otyryp, sol baǵdarlama arqyly mektepke shaqyrdyq. Sońǵy ýaqytta mektep túlekteriniń ózderi de joǵary oqý oryndaryn bitirip, ózimizdiń qatarymyzdy kóbeıtip jatyr", — dedi ol.
Aıta ketsek, ótken oqý jylynda osy mektep-lıtseıdiń 11-synyp oqýshylary túgeldeı UBT-dan joǵary upaı jınap, mektep tarıhynda tuńǵysh ret barlyǵy memlekettik grantqa ıe bolǵan. Al bul jerde negizgi pánderden er muǵalimderdiń sabaq beretinin de eskerý kerek.
