Mańǵystaýda úsh aıda 12 adam sýǵa ketti
Mańǵystaý oblysynda keıingi úsh aıda 12 adam sýǵa ketip, qaza tapty. Onyń beseýi – jasóspirim, dep habarlaıdy Kazinform.
Qaıtys bolǵan 8 adam jabdyqtalmaǵan aımaqta sýǵa túsken. Al ekeýi tyıym salynǵan aımaqta batyp ketken. Sondaı-aq eki kisi «Brız» jáne «Montajnık» demalys aımaqtarynda qaza tapqan.
«Shomylý maýsymyna arnaıy taldaý júrgizildi. Taldaý barysynda sýǵa batýdyń basty sebebi óńirde týrıster sany artyp, sý aıdyndarynda demalýshylardyń kóbeıýi ekeni belgili boldy. Sol sebepti jazǵy demalys kezinde balalardyń qaýipsizdigine kóp kóńil bólindi. Turaqty negizde synyptyq jáne ata-analar chatyna sý aıdyndaryndaǵy qaýipsizdik sharalary týraly tıisti jadynamalar men beınerolıkter jiberildi», - dedi Mańǵystaý oblysy Tótenshe jaǵdaı departamenti bastyǵynyń orynbasary Nurlybek Aıjaryqov.
Al óńir turǵyndary úshin endi balyq aýlaý maýsymy kele jatyr. Mamandar bul mezgilde de asa saq bolý kerektigin eskertip otyr.
«Alda ań jáne balyq aýlaý maýsymy kele jatyr. Adamdar sýda qaıyqpen júzedi de, qutqarý quraldaryn nemese sý aıdyny jaǵasynda balyq aýlap júrgende qaýipsizdik erejeleri týraly umytyp ketedi. Osyǵan oraı Mańǵystaý oblysynyń turǵyndary men qonaqtaryna balyq jáne ań aýlaý kezindegi qaýipsizdik erejelerin saqtaý keregin eskertemiz», - dedi Nurlybek Aıjaryqov.
