Mańǵystaýda ulttyq kıim chellendji jalǵasyn tapty
AQTAÝ. KAZINFORM – Mańǵystaýda elimiz boıynsha naýryznama onkúndigine oraı búgin Ulttyq kıim kúni ótip jatyr.
Osyǵan oraı Aqtaý qalasyndaǵy №21 mekteptiń oqýshylary naýryz aıy bastalǵaly sabaqqa ulttyq kıimmen keldi.. Osylaısha oqýshylar ulttyq kıim estafetasyn barlyq bilim ordalaryna joldap otyr.
Qala ákimdiginiń baspasóz qyzmetiniń málimetinshe, 2800-ge jýyq oqýshy bilim alatyn mektepte atalǵan kún erekshe ulyqtalyp otyr. Mektep muǵalimi Aıgerim Qojahmetova mektep ustazdary men oqýshylary ulttyq kıimdi naýryz aıy bastalǵaly kıip júrgenin atady.
«Mektebimizdiń ustazdary men oqýshylary ulttyq kıimdi 1 naýryzdan bastap kıip júr. Negizgi maqsat - jas urpaqtyń boıyna ulttyq qundylyqtardy darytý. Barsha aqtaýlyqtardy Naýryz merekesimen quttyqtaımyn», - dedi mektep muǵalimi Aıgerim Qojahmetova.
Budan bólek, oblystyń Munaıly aýdanynda ákimdiginiń ujymy ulttyq biregeıligimizdi aıqyndaıtyn oń bastama kóterip otyr. Naýryz aıynyń basynan bastap jergilikti ákimdik apparatynyń ujymy jumysqa kúndelikti ulttyq kıimmen kelip júrgenderin jetkizdi.
Ulttyq kıimdi nasıhattap, rýhanı mádenıetti dáripteý maqsatynda bastalǵan bastamaǵa aýyl ákimdikteri men ákimdikke qarasty memlekettik mekemeler de óz úlesin qosyp otyr.
