Mańǵystaýda túıelerdi qaraqurt shaǵyp jatyr

AQTAÝ. KAZINFORM — Áleýmettik jelide túıelerdi qaraqurt shaǵyp, úı janýarlaryna veterınarlyq kómek kórsetilip jatqan beınejazba tarady.

Oblystyq veterınarııa basqarmasynyń málimetinshe, rasymen de qaraqurt shaǵý derekteri tirkelgen. Qazir ár aýdanda veterınar dárigerler jumys istep jatyr jáne arnaıy chattar arqyly mal ıelerimen baılanys ornatylǵan. Zardap shekken janýarlarǵa alǵashqy kómek kórsetilgen.

— Búgingi tańda qaraqurt shaqqan 50-60 túıe tirkeldi. Janýarlardyń bári emdeldi. Tek, bir túıe óldi. Oqıǵalar Mańǵystaý, Túpqaraǵan, Beıneý jáne Munaıly aýdandarynda boldy. Aımaqta jappaı túıe malynyń ólim-jitimi tirkelgen joq, — deıdi oblystyq veterınarııa basqarmasy basshysynyń orynbasary Berdibek Marqabaev. 

Mamandar tórt túlikti qaraqurt shaqqan jaǵdaıda birden veterınarlardyń kómegine júginýge keńes berdi. Óıtkeni, qaraqurttyń ýy (neırotoksın) janýardyń júıke júıesine qatty áser etedi.

Buǵan deıin, Mańǵystaýdyń Beıneý aýylynda turǵyndy qaraqurt shaqqany týraly jazǵan bolatynbyz.