Mańǵystaýda tuńǵysh muz aıdyny kesheni ashyldy
JAŃAÓZEN. KAZINFORM – Búgin Jańaózen qalasynda angar tıpindegi kópfýnktsıonaldy muz aıdynynyń saltanatty ashylý rásimi ótti.
Igi sharaǵa Mańǵystaý oblysynyń ákimi Nurdáýlet Qılybaı qatysyp, jergilikti turǵyndardy tarıhı oqıǵamen quttyqtady.
— Memleket basshysy Qasym-Jomart Toqaev balalardy sportqa baýlýǵa árdaıym erekshe mán berip keledi. Mine sonyń aıqyn dáleli — búgingi is-shara. Jańa muz aıdynynda qysqy sport túrlerin damytý maqsatynda mánerlep syrǵanaýdan sport sheberi Alena Ponkratova arnaıy Sankt-Peterbýrgten shaqyrtylyp, osy keshende turaqty jattyqtyrý úshin kelisimshartqa otyrdy. Endi ata-analarǵa, jattyqtyrýshylar men sport uıymdaryna zor senim artylyp otyr. Jas sportshylarymyz kásibı jattyqtyrýshymen birge jańa bıikterdi baǵyndyryp, jarqyn jeńisterge jetetinine senimimiz mol. Kók Týymyzdy kókke kóteretin naǵyz sańlaqtar osy muz aıdynynan shyǵa bersin, — dedi Nurdáýlet Qılybaı.
Jańa keshenniń qurylysy 2023 jyly bastalyp, 2024 jyly tolyq aıaqtaldy. Joba jergilikti bıýdjet qarajaty esebinen júzege asyryldy.
Nysannyń jalpy aýmaǵy — 1100 sharshy metr, onyń ishinde muz alańy 960 sharshy metr. Muz aıdyny bir mezette 500 adamdy qabyldaı alady. Sporttyq keshende uldar men qyzdarǵa arnalǵan jýyný jáne kıim aýystyrý bólmeleri, jattyqtyrýshylar men medıtsınalyq qyzmetkerlerge arnalǵan kabınetter, sondaı-aq ákimshilik bólmeler qarastyrylǵan.
Keshenniń ekinshi qabatynda balalar men jasóspirimder sport mektebiniń tárbıelenýshilerine arnalǵan zamanaýı jattyǵý zaly ornalasqan. Munda 10-18 jas aralyǵyndaǵy alǵashqy daıarlyq toptary men jas sportshylar kásibı jattyqtyrýshylardyń jetekshiligimen jattyǵatyn bolady.
Aldaǵy ýaqytta nysanda hokkeı, short-trek, mánerlep syrǵanaý jáne kerlıng syndy olımpıadalyq sport túrlerinen tegin úıirmeler jumysyn bastaıdy.
