Mańǵystaýda týǵan jerge degen súıispenshilikti aıqyndaıtyn erekshe chellenj bastaldy
AQTAÝ. KAZINFORM – Mańǵystaýda «Sen Mańǵystaýdy ne úshin jaqsy kóresiń?» chellenji bastaý aldy.
Bul bastamanyń avtory — Azııa-Tynyq muhıty aımaǵynyń eń úzdik lıngvısi atanǵan Aqtaýlyq daryndy oqýshy. Jastardyń bastamasyn oblys ákimi Nurdáýlet Qılybaı qoldap, ózi de chellenjge qatysyp, búkil óńir jurtshylyǵyna joldady.
— Óz basym Mańǵystaýǵa álemdegi eń ǵashyq adammyn dep esepteımin. Bolashaqta Mańǵystaý — eń kórikti, órkenıetti, básekege qabiletti mamandar qalyptasqan, mádenıeti bıik, el qyzyǵatyn, meıman asyǵatyn ólke bolaryna senemin, — degen aımaq basshysy óz jazbasynda.
Chellenjge zııaly qaýym ókilderi, depýtattar, qoǵam belsendileri, úkimettik emes uıymdar, Analar keńesiniń músheleri, stýdentter, jastar men munaı, qurylys salasynyń jumysshylary belsendi túrde atsalysýda. Qatysýshylar kıeli ólkege degen ystyq yqylasyn bildirip, júrek jardy sózderin jazba túrinde qaldyryp jatyr.
Kóptegen jazbalarda Mańǵystaýdyń uly perzentteri — aqyn-jazýshylardyń danalyq sózderi de keńinen qoldanylyp otyr. Mysaly, zańǵar jazýshy Ábish Kekilbaevtyń:
«Mańǵystaýǵa Qudaı bárin bergen — astyna da, ústine de. Mańǵystaý degende, Qudaıdyń sarańdyǵy ustaǵan bir nárse bar, ol — bizdiń jerge ózen bermegen. Biraq Qudaı ádil bolǵandyǵynan da Qudaı bolyp tur ǵoı, sol jeriniń betine bermegen darııany osyndaǵy halyqtyń kókiregine bergen», — degen tereń oıy kóptegen qatysýshylardyń júreginen oryn tapty.