Mańǵystaýda referendýmǵa daıyndyq qalaı júrgizilip jatyr
AQTAÝ. KAZINFORM – Mańǵystaý oblysy boıynsha referendýmǵa qatysý quqyǵy bar 447 121 turǵyn bar. Bul týraly oblystyq referendým komıssııasy habarlady.
2026 jylǵy 15 naýryzǵa taǵaıyndalǵan respýblıkalyq referendýmdy ázirleý jáne ótkizý boıynsha Mańǵystaý oblystyq referendým komıssııasy tarapynan tıisti jumystar atqarylýda.
Ortalyq referendým komıssııasynyń qaýlysyna sáıkes negizgi is-sharalardyń kúntizbelik jospary bekitilgen. Josparǵa sáıkes aýmaqtyq jáne ýchaskelik referendým komıssııalarynyń quramy, jumys ýaqyty, ornalasqan jeri men shekaralary týraly aqparat jarııalandy.
Oblys boıynsha múgedektigi bar 3 646 saılaýshy bar. Olardyń daýys berý ýchaskelerinde kedergisiz kirip-shyǵýyna jáne daýys berýine barlyq qajetti jaǵdaılar jasalyp jatyr.
Komıssııa múshelerine arnalǵan oqytý semınarlary uıymdastyryldy. Túsindirý jumystary Prezıdent janyndaǵy Memlekettik basqarý akademııasynyń oblystyq fılıaly bazasynda jáne óńirlerge shyǵý arqyly ótkizilýde.
Oblysta 8 aýmaqtyq jáne 261 ýchaskelik komıssııa jumys isteıdi. Olardyń quramyna 1 843 adam tartylǵan. Onyń ishinde 249 ýchaske azamattardy tirkeý oryndary boıynsha, 12 ýchaske ýaqytsha oryndar boıynsha qurylǵan.
Referendým kúni ýchaskelerde onlaın-qyzmeti jumys isteıdi. Ol arqyly azamattar ózderin tizimnen tekserip, ýaqytsha tirkelý múmkindigine ıe bolady.
Buǵan deıin, Azamattarǵa referendým ýchaskesi ornalasqan úı-jaıǵa ýaqytsha tirkelý múmkindigi beriletini týraly jazǵan bolatynbyz