Mańǵystaýda munaı qaldyqtaryn jerge tókken kompanııa tekseriledi

AQTAÝ. KAZINFORM –Mańǵystaý oblystyq ekologııa departamentiniń basshysy Armat Júsipqalıev osy oqıǵa boıynsha «ECSAD» kompanııasyna jospardan tys tekserý júrgiziletinin jetkizdi.

Oblystyń bas ekologynyń aıtýynsha, munaıdyń qaldyqtaryn óńdeý – «ECSAD» kompanııasyna tıisili. Onyń negizgi ornalasqan jeri Aqtaý qalasynan 690 shaqyrymda, Boranqul eldi mekeniniń Qamysty degen jerinde ornalasqan. Mekeme munaı qaldyqtaryn remedıatsııalaý jáne bıologııalyq jolmen óńdeýmen aınalysady.

- Bul kompanııa 2021 jyly ekologııalyq saraptamadan ótip, bizden ruqsat qaǵaz alǵan bolatyn. Ruqsat qaǵazy 2026 jylǵa deıin jaramdy. Halyqta kóp suraq týyndap otyr, qazyp jatyr, munaıdy jerge tógip jatyr deıdi. Negizi tehnologııalyq protsess boıynsha jer qazylyp, astyna plenka tóseledi. Sodan keıin óziniń topyraǵy bar, sol tóselý kerek. Al, áleýmettik jelide taraǵan beınejazba boıynsha aıtarym, ekologııa departamenti prokýratýramen birlesip, jospardan tys tekserý júrgizemiz. Sol kezde durys jasap jatyr ma, joq pa, anyqtap, aldaǵy ýaqytta qorytyndysyn beremiz, - deıdi departament basshysy Armat Júsipqalıev.

Al, oǵan deıin, Beıneýdegi tabıǵat qorǵaý prokýratýrasynan ókilderi oqıǵa ornyna barǵan. Qorytyndysy endi bilgili bolmaq.

Buǵan deıin, Mańǵystaýda ken oryndarynyń birinde burǵylaý qondyrǵysy qulap ketkeni týraly jazǵan bolatynbyz