Almaty oblysy Іle aýdanynyń eks-ákimi Baǵdat Qarasaevqa qatysty sot úkimi shyqty
QONAEV. KAZINFORM — Almaty oblysy Іle aýdanynyń burynǵy ákimi Baǵdat Qarasaev 3 jyl 3 aıǵa bas bostandyǵynan aıyryldy.
Bul týraly Almaty oblystyq sotynyń Kazinform agenttigi resmı saýalyna bergen jaýabynda aıtylǵan.
Іle aýdandyq soty Baǵdat Qarasaevqa jáne basqa da qatysýshylarǵa qatysty qylmystyq isti qaraǵan.
Sot Qarasaevty laýazymdyq ókilettigin teris paıdalanyp, jeke sharýashylyq seriktestigine jer ýchaskesin zańsyz bergenin, turmystyq qatty qaldyqtar polıgonyn basqarý kezinde atalǵan kásiporynǵa qamqorlyq kórsetkenin, sondaı-aq zańsyz túrde kásipkerlik qyzmetpen aınalysqanyn anyqtady.
Sot úkimi boıynsha:
• Q. 361-baptyń 3-bóligi jáne 364-baptyń 3-bóligi boıynsha kináli dep tanylyp, 3 jyl 3 aıǵa bas bostandyǵynan aıyryldy jáne memlekettik qyzmetterde jumys isteýge ómir boıy tyıym salyndy;
• B. 361-baptyń 1-bóligi boıynsha kináli dep tanylyp, oǵan 1 jyl merzimge bostandyqty shekteý jazasy berildi jáne memlekettik qurylymdarda qyzmet etýge ómir boıy tyıym salyndy;
• D. 195-baptyń 4-tarmaǵy 2-bóligi boıynsha kináli dep tanylyp, oǵan 2 jyl 6 aı merzimge bostandyqty shekteý jazasy kesildi jáne 3 jyl boıy memlekettik múlikti senip basqarý qyzmetimen aınalysýǵa tyıym salyndy;
• M. aqtaldy.
Úkim zańdy kúshine engen joq.
Aıta keteıik, Baǵdat Qarasaev Іle aýdanynyń ákimi laýazymyn 2018 jylǵy qyrkúıekten bastap atqarǵan. Ony Antıkor qyzmetkerleri 2024 jylǵy qyrkúıekte sybaılas jemqorlyq kúdigimen ustaǵan.
Keıinirek Antıkor Іle aýdanynyń burynǵy ákimine qarjy jymqyrýmen qosa, laýazymdyq ókiletin asyra paıdalandy degen aıyp taqty.
Oǵan órt qaýipsizdigi talaptaryn buza otyryp, sanıtarlyq-epıdemıologııalyq baqylaý organdarynyń ruqsatynsyz affılıırlengen kompanııaǵa qatty turmystyq qaldyqtar polıgonyn senimgerlik basqarýǵa berdi degen aıyp taǵyldy.
Qylmystyq áreketke aýdandyq qarjy jáne turǵyn úı-kommýnaldyq sharýashylyq bólimderiniń basshylary da tartylǵan. Kompanııanyń qatty turmystyq qaldyqtardy kádege jaratý boıynsha shartta kózdelgen mindettemeleri oryndalmaǵan, al onyń qyzmetinen túsken tabysty ákim jeke ózine paıdalanǵan. Óńir ekologııasyna bul áreketterdiń saldarynan 204 mln teńge kóleminde zalal kelgen.
Al 2025 jylǵy maýsymda Baǵdat Qarasaevqa qatysty sot otyrysy bastalǵanyn jazǵanbyz.