Mańǵystaýda Qyzyl kitapqa engen arqarlar kóbeıgen

Sońǵy málimetter boıynsha, Mańǵystaýda Qyzyl kitapqa engen janýarlardyń sany 1059-ǵa deıin ósti, dep habarlaıdy Kazinform lada.kz saıtyna silteme jasap.

Qoǵamdyq kommýnıkatsııalar ortalyǵynyń málimetinshe, sońǵy úsh jylda oblysta arqarlardyń sany 18 paıyzǵa artqan. 2021 jyly olardyń sany 861 bolsa, bıyl 1059 basqa jetti.

Bul janýarlarlardyń sanaǵyn 5-11 qazan aralyǵynda «PO Ohotzooprom» mekemesi men Zoologııa ınstıtýtynyń qyzmetkerleri júrgizdi. 

"Arqarlardyń sońǵy sanaǵynda janýarlardyń ósý dınamıkasy oń boldy. Al olarǵa joıylyp ketý qaýpi tónip turǵanyn jáne Qyzyl kitapqa engenin eskersek, bul sanaqtyń nátıjesi qýantady. Bıyl 42 jasandy bulaq kózin ashsaq, olar qoryq janýarlaryn sýarý úshin paıdalanylýda. Reıdtik is-sharalar, sonyń ishinde órt qaýipsizdigin tekserý úzdiksiz júrgizilip jatyr", - deıdi "Qyzylsaı" óńirlik tabıǵı parkiniń qyzmetkerleri.

Aıta keteıik, Mańǵystaýda «Qyzylsaı» memlekettik óńirlik tabıǵı parkiniń qaramaǵynda «Tasorpa», «Jabaıushqan», «Adamtas», «Manashı» memlekettik tabıǵı qoryqshalary bar.