Mańǵystaýda ekologııalyq zań talaptaryn buzǵan 11 karer anyqtaldy
AQTAÝ. KAZINFORM — Bul týraly oblystyq tabıǵı resýrstar jáne tabıǵat paıdalanýdy retteý basqarmasynyń basshysy Sábıt Dúısekenov málimdedi.
Onyń aıtýynsha, Shetpe aýylynyń turǵyndary eldi mekenniń janyndaǵy karerlerdegi jarylys jumystarynyń dúmpýinen, shań-tozańnan jáne aýyr kólikterdiń qozǵalysynan týyndaıtyn ekologııalyq, materıaldyq máselelerge kóp jyldan beri shaǵymdanyp keledi.
Soǵan sáıkes, oblystyq tabıǵı resýrstar jáne tabıǵat paıdalanýdy retteý basqarmasy bıylǵy jartyjyldyqta karerlerdiń jumysyn baqylaý maqsatynda, arnaıy synama júrgizgen. Tekserý barysynda 16 núkteden alynǵan 66 synamanyń barlyǵy ekologııalyq normalarǵa sáıkes kelgen.
Biraq, basqarma tarapynan 2023–2024 jyldar aralyǵynda Shetpe aýyly mańyndaǵy qıyrshyq tas óndiretin keshenderge josparly monıtorıng júrgizilgen. Nátıjesinde, kelisimsharttyq mindettemelerin oryndamaǵan 7 karer men ekologııalyq zańnama talaptaryn buzǵan 11 karer anyqtaldy.
— Atalǵan kásiporyndarǵa 2025 jylǵy shilde aıynda resmı eskertý hattary joldanyp, úsh aı ishinde anyqtalǵan zań buzýshylyqtardy joıý talaby qoıyldy. Zań talabyna sáıkes úsh aı merzim ishinde jer qoınaýyn paıdalanýshylar kelisimsharttyń jáne lıtsenzııanyń buzylǵan talaptaryn qalpyna keltirmegen jaǵdaıda, jer qoınaýyn paıdalanýǵa berilgen lıtsenzııalar qaıtarylyp, kelisimsharttary birjaqty tártippen merziminen buryn toqtatylatyn bolady, — deıdi basqarma basshysy Sábıt Dúısekenov.
Sábıt Dúısekenovtiń aıtýynsha, qazir aýyl aýmaǵynda 25 jer qoınaýyn paıdalanýshy mekeme tirkelgen. Onyń ishinde 20 kásiporyn kelisimshart negizinde, al 5 kásiporyn lıtsenzııa negizinde jumys istep jatyr. Jer qoınaýyn paıdalanýshylar tarapynan zańsyz óndirý jumystaryn júrgizgendigi anyqtalǵan jaǵdaıda olarǵa — 110 000 000 teńge aıyppul salynady.
— Shetpe aýyly mańyndaǵy karerlerdiń qyzmetin turaqty baqylaý maqsatynda Mańǵystaý oblysy ákiminiń ókimimen arnaıy jumys toby quryldy. Onyń quramyna quqyq qorǵaý organdary, ýákiletti memlekettik organdar men jergilikti atqarýshy organdar kiredi. Bul jumys toby jer qoınaýyn paıdalanýshylardyń qyzmetiniń zań talaptaryna saı bolýyn qadaǵalaıtyn bolady. Eger buzýshylyqtar joıylmasa, tıisti sharalar qabyldanyp, zańǵa sáıkes karerlerge shekteýler engiziledi, — deıdi oblystyq tabıǵı resýrstar jáne tabıǵat paıdalanýdy retteý basqarmasynyń basshysy Sábıt Dúısekenov.
Buǵan deıin, Mańǵystaýda tóbesi opyrylyp túsken mektep boıynsha qylmystyq is qozǵalǵanyn jazǵan edik.