Mańǵystaýda eki kelinniń enesi qyz bosandy
AQTAÝ. KAZINFORM – Mańǵystaý oblysynda eki kelin túsirgen ene qyryqtan asqan shaǵynda qyzdy boldy.
42 jastaǵy Aınur Ermuhanova Jańaózen qalasynyń irgesindegi Qyzylsaı aýylynda turady. Jas bosanǵan ana aýyl mektebinde 21 jyldan beri eńbek etip kele jatqan tarıh pániniń muǵalimi. Otaǵasymen birge 4 ul tárbıelep otyrǵan keıipkerimiz 17 sáýir kúni Aqtaý qalasyndaǵy «Ana men bala» ortalyǵynda sábıin ómirge aman alyp kelgenin atady.
«Qyzymnyń densaýlyǵy jaqsy. Salmaǵy 3 keli 250 gramm bolyp ómirge keldi. Akýsher Tursynaı Qýanyshqyzy barlyq kómegin kórsetip, tıisti sharalardy oıdaǵydaı atqara bildi. Kishkentaıymyzdy otbasymyzben birge perzenthanadan alyp, úıge kelgen betimiz osy. Týystarymyzdyń bári quttyqtap, máre-sáre bolyp jatyrmyz», - dedi Aınur Ermuhanova.
Qyzylsaılyq Aınur Ermuhanova búginde shańyraǵyna eki kelin túsirgen ardaqty ene. Onyń úlken balalary birneshe jyl buryn úılenip, búginde olardan úsh nemere súıip otyr.
«Joldasym munaı-gaz salasynda eńbek etedi. Tórt uldyń úlkeni 22 jasta. Odan keıigisi 21 jasqa aıaq basty. Ekeýi de úılengen. Qazir jeke kásippen aınalysyp júr. Uldardyń kenjesin 2015 jyly ómirge ákeldim. Tuńǵyshym men qyzymnyń arasy 22 jasty quraıdy. Kishkentaıymdy qudaıdyń bergen nesibesi dep bilemin. Osy jasymda qyzdy bolsaq dep josparlaǵan joqpyz», - deıdi ana Kazinform tilshisine bergen suhbatynda.
Aınur Ermuhanovany kenjesimen perzenthanadan kúıeýi, tórt uly, eki kelini men enesi 101 raýshan gúlin tabystap, shyǵaryp aldy.
Aıta keteıik, naýryz aıynyń basynda Aqtaýda salmaǵy 5 keliden asatyn sábı dúnıege kelgen bolatyn. Munaıly aýylyna qarasty Batyr aýylynda turatyn alyp sábıdiń esimin anasy Nurdáýlet dep qoıǵan edi.
