Mańǵystaýda dalaǵa shashylǵan qoqys: ákimdik sebebin túsindirdi
AQTAÝ. KAZINFORM – Aqtaýlyq qoǵam belsendisi Azamat Sársenbaev oblys aýmaǵyndaǵy qoqysqa toly aýmaqty beınejazbaǵa túsirip, ony áleýmettik jelide jarııalady. Beınejazbada dalada shashylyp jatqan polıetılen qapshyqtar men plastık bótelkelerdi, olardyń arasynda jaıylyp júrgen túıeni kórýge bolady.
Osy jaǵdaıǵa baılanysty Mańǵystaý oblysynyń tabıǵı resýrstar jáne tabıǵat paıdalanýdy retteý basqarmasy túsinikteme berdi.
— Bul Mańǵystaý oblysy Munaıly aýdany Baıandy aýylynda ornalasqan qatty turmystyq qaldyqtar polıgony aýmaǵynda shashylǵan qoqys. Eń aldymen, atalǵan nysan qoldanystaǵy qatty turmystyq qaldyqtar polıgony ekenin atap ótemiz. Munda qaldyqtardy ornalastyrý jáne jınaqtaý belgilengen normalarǵa sáıkes júzege asyrylady. Sonymen qatar, jeńil fraktsııaly qaldyqtardyń irgeles aýmaqqa taralýy keıbir jaǵdaılarda tehnologııalyq jáne tabıǵı faktorlarǵa baılanysty bolýy múmkin, — delingen habarlamada.
18-sáýirde polıgon aýmaǵynda josparly sanıtarlyq tazalyq jumystary júrgizilgen. Alaıda, 20-sáýirde polıgon mańynda órt boldy. Órtti sóndirý jumystary kezinde, sondaı-aq jeldiń kúsheıýi saldarynan jeńil qaldyqtar (qaǵaz jáne basqa da materıaldar) negizgi ornalastyrý aımaǵynan tys jerlerge qaıta taralǵan.
— Atalǵan jaǵdaı ýaqytsha sıpatqa ıe ekenin jáne polıgondy kútip-ustaý boıynsha júıeli jumystyń joqtyǵyna baılanysty emes ekenin atap ótemiz. Qazirgi ýaqytta polıgon aýmaǵy men oǵan irgeles ýchaskelerdi tolyq tazartý boıynsha jedel jumystar uıymdastyrylyp, tıisti qyzmetter men arnaıy tehnıka jumyldyrylǵan. Jumystar kúsheıtilgen rejımde júrgizilýde, — delingen habarlamada.
Buǵan deıin, Mańǵystaýda nóser jaýynnan keıin júzden astam jylqy qyrylǵanyn jazǵan bolatynbyz.