Mańǵystaýda balalar arasynda týberkýlez aýrýy 2 ese ósken
AQTAÝ. KAZINFORM – Mańǵystaý oblystyq sanıtarlyq-epıdemıologııalyq qadaǵalaý basqarmasynyń málimetinshe, bıyl toǵyz aıdyń qorytyndysy boıynsha aımaqta týberkýlezdiń 208 jańa jaǵdaıy tirkeldi. Syrqattanýshylyq deńgeıi 100 myń turǵynǵa shaqqanda 26-ny qurady. Bul kórsetkish 2023 jyldyń osy kezeńimen salystyrǵanda 5 jaǵdaıǵa kóp. Al, jasóspirimder arasynda 13 jaǵdaıǵa nemese 1,6 esege ósý baıqalady.
-17 jasqa deıingi balalar arasyndaǵy týberkýlezben aýrýshańdyq 2023 jyldyń 9 aıyndaǵy 6,9-dan 2024 jyldyń 9 aıynda 10,9-ǵa deıin ósti. Bul 1,6 ese kóp degendi bildiredi. Jasóspirimder arasynda týberkýlezben aýyrý Túpqaraǵan aýdanynda 0-den 9 jaǵdaıǵa, Jańaózen qalasynda 2-den 5-ke, Beıneý aýdanynda 4-ten 6-ǵa, Aqtaý qalasynda 5-ten 9-ǵa deıin ósti. Beıneý aýdanynyń kórsetkishi oblystyq kórsetkishten 1,1 ese, Túpqaraǵan aýdany 4,9 ese joǵary, - deıdi Mańǵystaý oblystyq sanıtarlyq-epıdemıologııalyq qadaǵalaý basqarmasy bastyǵynyń orynbasary Berdibek Saraltaev.
Mańǵystaý oblystyq ftızıopýlmonologııa ortalyǵy dırektorynyń orynbasary Qundyz Qyrqymovanyń aıtýynsha, Mańǵystaý oblysynda týberkýlezben kúres baǵdarlamasyn júzege asyrýǵa óńirdiń kóptegen medıtsınalyq uıymdary qatysýda.
- Aımaqta 90 mınýtta ızonıazıdke, ftorhınolondarǵa, ekinshi qatardaǵy ınektsııalyq preparattarǵa (amıkatsın, kanamıtsın, kapreomıtsın) jáne etıonamıdke tózimdilikti anyqtaıtyn XDR GENE-XPERT apparaty jumys istep tur. Jyl saıyn 500-600 naýqasqa týberkýlezge qarsy em taǵaıyndalady. Bıyl 9 aıda 376 naýqas em aldy. Sezimtaldyǵy saqtalǵan týberkýlezben aýyratyn naýqastardyń emdelý tıimdiligi 94,4% qurady, - deıdi Qundyz Qyrqymova.
Mamandardyń málimetinshe, Mańǵystaýda sońǵy 10 jylda týberkýlezben aýrýshańdyq pen ólim-jitim deńgeıi turaqty tómendeý tendentsııasyna ıe.
Buǵan deıin, SQO-da týberkýlezben aýyrǵandarǵa 38 mln teńge somasynda járdemaqy berilgeni týraly jazǵan bolatynbyz.
