Mańǵystaýda Alǵys aıtý kúnine oraı 10 myńǵa jýyq is-shara ótedi
AQTAÝ. KAZINFORM - Mańǵystaý oblysynda 29 aqpan men 3 naýryz aralyǵynda Alǵys aıtý kúnine oraı 10 myńǵa jýyq is-shara ótedi.
Mundaǵy basty maqsat – meıirimdilik, dostyq, rızashylyq, azamattardyń bir-birine degen súıispenshiligin, adamı qundylyqtaryn qoǵamda ilgeriletý arqyly qazaqstandyq biregeılik pen halyq birligin damytý jáne nyǵaıtýǵa baǵyttalǵan.
Mańǵystaý oblystyq Іshki saıasat basqarmasy basshysynyń orynbasary Baýyrjan Ábdiqadyrovtyń aıtýynsha, merekege oraı «Qaıyrymdylyq kerýeni» QHA respýblıkalyq aktsııasy aıasynda «Naýryz qorjyny» syıǵa beriledi. Sondaı-aq Qazaqstanda týyp, tarıhı Otanyna qaıta oralǵan etnos ókilderin belsendi qatystyra otyryp, ǵylymı konferentsııalar, dóńgelek ústelder, kezdesýler, bilim berý jáne basqa da mekemelerde alǵys taqyrybyna arnalǵan «Tarıh ǵıbraty» sabaqtarynyń onkúndigi is-sharalary uıymdastyrylady.
«Qazaqstan halqy Assambleıasynyń tarıhy týraly «Halyqtyń alǵysy – Uly marapat» atty buqaralyq teatrlandyrylǵan qoıylymdar men teatrlandyrylǵan kórinister, «Bolashaqqa birge!» flesh-mobtary, kitaptar, muraǵat materıaldary, fotosýretter kórmeleri, «Alǵys aıtý – paryzyń» mektep oqýshylary arasynda shyǵarmalar baıqaýy ótedi. Sonymen qosa, «Qazaqstan – baqyt mekeni» atty Qazaqstan etnostary týraly beınerolıkter men derekti kınolar festıvali, «Týǵan jerim – júregimde!» ataýymen shetelde turatyn qazaqstandyqtardyń onlaın-quttyqtaýlary, áleýmettik jelilerdegi betterindegi marafon, «Shańyraq» etnosaralyq qatynastar salasyndaǵy azamattar arasyndaǵy úzdik beınerolıkterge shyǵarmashylyq baıqaýy bastalady. Elimizdiń, óńirdiń damýyna úles qosqan túrli kásip ókilderiniń alǵys aıtý beınerolıkteri de kórsetiletin bolady», - dedi Baýyrjan Ábdiqadyrov.
Ataýly kúnge oraı buqaralyq is-sharalar qalalyq alań, saıabaqtarda, Dostyq úıinde ótkiziledi. Oblystyq qoǵamdyq kelisim ortalyǵynyń Amankúl Jaıylhanova merekeniń jańashyldyǵyn alǵa tartty.
«Bıylǵy Alǵys aıtý kúniniń ereksheligi - «Araıly Atamekenim» chellendji. Maqsaty – ortaq tarıhı jady, barlyq qazaqstandyqtar arasyndaǵy beıbitshilik pen kelisim negizinde Qazaqstan halqynyń birligi men qazaqstandyq biregeılikti nyǵaıtý, patrıotızmge, jaýapkershilikke jáne rýhanı damýǵa, adamdarǵa jáne qorshaǵan ortaǵa jaqsy qarym-qatynas ornatýǵa tárbıeleý. Atalǵan chellendjge eńbektegen baladan eńkeıgen qartqa deıin qatysa alady. Qatysýshylar ózderiniń qyzyqty oqıǵalarymen, sonymen qatar týǵan jerge degen súıispenshiligi men mádenı erekshelikteri, dástúri men qundylyqtary, qoǵamdaǵy birlik pen kelisim týraly oı-pikirimen bólisip, alǵysyn bildiredi. Quttyqtaý men alǵys sózinen keıin Qazaqstan Respýblıkasynyń memlekettik rámizderiniń fonynda E.Hasanǵalıevtiń «Atameken» ánin oryndaý kerek», - dedi Amankúl Jaıylhanova.
