Mańǵystaýda 62 kásipkerdiń quqyǵy qorǵaldy
AQTAÝ. KAZINFORM — Beıneý aýdanynda prokýratýra men aýdandyq Memlekettik kirister basqarmasy júrgizgen tekseris nátıjesinde, 62 kásipkerge jalpy somasy 16,6 mln teńge bolatyn negizsiz habarlamalar berilgeni anyqtaldy.
— Salyq organy salyqty eseptegen kezde satylatyn múliktiń quny týraly qate derekterdi qoldanǵany anyqtaldy, sonyń nátıjesinde negizsiz habarlamalar jiberilgen. Sonymen qatar, salyq organy múliktiń naryqtyq qunyn anyqtamaǵan, ıaǵnı baǵalaý quny nemese ýákiletti organnyń resmı kadastrlyq quny týraly naqty málimetter almaǵan. Nátıjesinde kásipkerlerge zańsyz shekteýler qoldanylyp, esep shottary buǵattalǵan jáne qyzmeti toqtatylǵan, — delingen habarlamada.
Anyqtalǵan faktiler boıynsha prokýrorlyq qadaǵalaý aktisi engizilip, zańsyz habarlamalardyń kúshi joıylǵan. Zań buzýshylyqtarǵa jol bergen tulǵalar tártiptik jaýaptylyqqa tartylyp, 62 kásipkerdiń quqyǵy qorǵaldy.
Buǵan deıin habarlanǵandaı, Bas prokýratýra esirtkige qatysty aqshany baqylaýǵa arnalǵan JI platformasyn iske qosty.