Mańǵystaýda 50-ge jýyq kósheniń ataýy ózgerdi
Mańǵystaýdaǵy Aqtaý qalasyna qarasty Prımorskıı jáne Raýan turǵyn úı massıvteriniń elýge jýyq kóshesiniń ataýy ózgerdi. Onyń birqataryna qazaqsha ataý berildi, dep habarlaıdy Kazinform.
Buǵan deıin Aqtaý qalasyna qarasty Prımorskıı turǵyn úı massıvi — Aqjelken, al Prıozernyı turǵyn úı massıvi — Oımasha degen qazaqsha ataý alǵanyn jazǵan edik.
Endi osy turǵyn úı massıvteriniń kósheleri de ózgerdi.
Atap aıtsaq, Prımorskıı turǵyn úı massıviniń Jemchýjına kóshesi — Aqmarjan, Vesennıaıa kóshesi — Kóktem, Ýrojaınaıa kóshesi — Qulager bolyp ózgertildi.
Raýan turǵyn úı massıvindegi ataýy joq kóshelerge Aqqorǵan, Jolbaıan, Aqmaıa, Shyńyraý, Aqespe syndy ataý berilgen.
— Qazaqstannyń ákimshilik-aýmaqtyq qurylysy týraly zańnyń 14-babynyń 4-tarmaqshasyna sáıkes, Mańǵystaý oblysy ákimdigi janyndaǵy onomastıka komıssııasynyń 2023 jylǵy 18 sáýirdegi qorytyndysy negizinde jáne aýyl halqynyń pikirin eskere otyryp, turǵyn úı massıviniń jáne kóshelerdiń ataýyn ózgertý jóninde sheshim qabyldandy. Raýan turǵyn úı massıvinde — 32 kóshe, al Prımorskıı massıvinde — 16 kósheniń ataýy ózgerdi, — dedi Ómirzaq aýylynyń ákimi Bısenǵalı Kenjalıev.
