Mańǵystaýda 1 myń gektar jer memleketke qaıtaryldy
AQTAÝ. KAZINFORM – Bul týraly Qazaqstan Aýyl sharýashylyǵy mınıstrliginiń baspasóz qyzmeti habarlady. Jer ýchaskesi kásipkerge sharýa qojalyǵyn júrgizý úshin berilgen.
Alaıda uzaq ýaqyt boıy óziniń maqsatyna saı paıdalanylmaǵan. Sondyqtan sot arqyly jer májbúrli túrde alynyp, memleket menshigine qaıtarylǵan.
- Jer ýchaskesiniń paıdalanylmaı jatqany Mańǵystaý oblysynyń Jer resýrstaryn basqarý departamenti júrgizgen jospardan tys tekserý barysynda anyqtaldy. Menshik ıesine jer zańnamasyn buzýshylyqtardy joıý týraly nusqama berilgen. Biraq nusqamanyń bir jyl ishinde oryndalmaýyna baılanysty, sot sheshimimen menshik ıesine ákimshilik aıyppul salyndy, - delingen habarlamada.
Departament jer ýchaskesin memleket menshigine májbúrlep qaıtarý týraly sotqa talap aryz bergen. Nátıjesinde Mańǵystaý oblysynyń «Oteý-Baqaı» jerinde 1000 gektarǵa jýyq jer memlekettik menshikke qaıtaryldy.
Buǵan deıin, Aqtaýda Kaspıı teńiziniń abattandyrylǵan jaǵalaýdan alystap bara jatqany týraly jazǵan bolatynbyz.