Mańǵystaý atom energetıkalyq kombınatynyń aldaǵy tórt jylǵa jospary naqtylandy
Mańǵystaý atom energetıkalyq kombınatyn jańǵyrtý boıynsha jumys tobynyń otyrysy ótti. Jıynda aldaǵy 4 jylda atqarylatyn sharalar naqtylandy. Bul týraly kásiporynnyń baspasóz qyzmetinen málim etti, dep habarlaıdy Kazinform.
Jumys tobynyń otyrysyna Mańǵystaý oblysy Energetıka jáne Turǵyn úı kommýnaldyq sharýashylyǵy basqarmasynyń basshysy Ábdesh Túrikmenbaev tóraǵalyq etti. Keńeske kombınat basshylyǵy, «MAEK» JShS qurylymdyq bólimsheleri men departamentteriniń basshylary, qoǵamdyq uıymdardyń ókilderi jáne oblystyń belsendi azamattary qatysty.
«Kásiporynnyń óz qarajaty esebinen 2023 jylǵa arnalǵan jóndeý naýqanyna 6,8 mlrd teńge kóleminde qarajat qarastyrylǵan. Oǵan týrboagregattarǵa, qazandyq agregattarǵa jáne qosalqy jabdyqqa kúrdeli jóndeý júrgizilip jatyr.
Jergilikti bıýdjetten elektr stantsııalarynyń, sý tushytý qondyrǵylarynyń jáne jylý almasý tútikteriniń tozǵan jabdyqtaryn aýystyrýǵa 2,6 mlrd teńge mólsherinde qarajat bólindi, sonyń esebinen sý tushytý qondyrǵylarynyń ónimdiligi táýligine 5000 m3 deıin ulǵaıýy tıis», - delingen baspasóz málimetinde.
Sondaı-aq respýblıkalyq rezervten jabdyqtar men jıyntyq jabdyqtardy satyp alýǵa 4,9 mlrd teńge kóleminde qarajat bólingen. Jumystar jyl sońyna deıin jalǵasady.
Al jylý elektr stantsııasy jabdyǵynyń edáýir tozýyna baılanysty 2024 jyly №3 energoblokty ishinara jańǵyrtyp kúrdeli jóndeý júrgizý, sondaı-aq 2025 jyly №2 energoblokty, 2026 jyly №1 energoblokty tolyq jańǵyrtýmen kúrdeli jóndeý júrgizý josparlanǵan.
Oǵan qosa 2027 jyly jylý elektr stantsııasynyń bas korpýsyndaǵy aıaqtalmaǵan qurylys ornynda qýaty 230 MVt №4 energoblok salý josparlanyp otyr.
Keńes barysynda jylý maýsymyna daıyndyq máselesi de talqylandy.
Esterińizge sala ketsek, shildede qazandyqqa berilip turǵan toq deńgeıiniń kúrt ósýine baılanysty «MAEK» JShS JES №1 energoblogy májbúrli túrde toqtatylǵan edi.
Jóndeý jumystary jedel jasalyp, energoblok qazandyǵy biraz ýaqyt sýytylyp turǵan soń, iske qosyldy.
Al jýyrda MAEK-tegi jóndeý jumystary kúzden keıin de jalǵasatynyn jazǵan edik.