Mandolına shertetin arystyq ájeı toı-bıznesten tabys taýyp júr
TÚRKІSTAN. KAZINFORM — Arys qalasynyń turǵyny Roza Seıitqasymova ıtalııalyq mandolına aspabyn shertip, án salady. Segiz shekti aspapty shertýdi bala kúninde úırengen. 14 jasynda Shámshi Qaldaıaqovtyń aldynda óner kórsetken ánshi qyzǵa án padıshasy aq batasyn beripti.
Aq jaýlyqty ájeni toı-qudalyqtarǵa shaqyratyndar kóp. Tipti, aldyn ala tapsyrys berip, alys-jaqyn qalalarǵa da alyp ketetinder bar.
Mundaıda mandolınin qolǵa alǵan ánshi áje shabyttanyp, retro ánder men jańadan shyqqan estradalyq ánderdi naqyshyna keltire oryndaıdy.
Poppýrı tartyp, qudalyqty qyzdyrady.
«Meniń belgilep qoıǵan baǵam joq. Toı ıesi qansha teńge beredi, sony alamyn. Alǵashqyda qonaqtardyń barshasy tań qalyp jatady. Al, bir-eki án salǵan soń ortany bermeı bıleıtinder kóp», — deıdi ánshi áje.
Roza Seıitqasymovanyń arnaıy mýzykalyq bilimi joq. Tek mektepte oqyp júrgen sátinde án sabaǵynan dáris beretin aǵaıynan mandolın tartýdy úırenip alǵan.
Sodan beri mektepishilik, aýdanaralyq is-sharalarda án aıtyp, kópshiliktiń yqylasyna bólenip keledi.
Oblystyq deńgeıde uıymdastyrylǵan «Termeshiler jarysy» men «Men estimegen bir án» sekildi baıqaýlarǵa da qatysyp, júldeli oryndardy ıelengen.
«Buryn áskerge ketken jastardy ánmen shyǵaryp salyp, ánmen kútip alatynbyz. Keıin ata-anam qarsy bolǵandyqtan múldem án aıtpaı kettim. Turmysqa shyqqan soń, joldasym da ruqsat etpedi. Ul-qyzym ósken soń, qudaǵalyqtarynda án aıtyp, qudalarymdy tań qaldyrdym. Sodan keıin meni ózge de qudalyqtarǵa shaqyra bastady», — deıdi ol.
Ánshi ájeniń bar armany — úlken sahnada óner kórsetý bolypty. Bul armanyn ázilkesh Tursynbek Qabatov oryndaǵan.
Shymkentte ótken qudalyqtyń birinde ájeıdiń ónerine tántti bolǵan Tursynbek óziniń kontsertine qatysýǵa shaqyrǵan.
«Qurbym meni úlken sahnaǵa shyǵarmaqshy bolyp, qatty júgirdi. Araǵa tanystaryn salyp, mádenıet mekemeleriniń basshylaryna shyqty. Sahnada án aıtýǵa bir mekemeniń basshysy 300 000 teńge surady. Sodan ol aqshany bireýge bergenshe, bir taılaqty soıyp alyp, soǵym eteıik dep sheshtik. Keıin mandolınmen án aıtqanymdy kórgen Tursynbek kontsertine shaqyrdy. Bardym. Úlken sahnada án aıttym. Halyqtyń da yqylasy erekshe boldy. Sondaǵy qalamaqyma jańa mandolına satyp aldym», — deıdi ol.
Búginde ájede eki mandolına bar. Onyń birin oqýshy kezinen beri ustap keledi. Eskirgen.
Shekteri de tartylmaı qalǵandyqtan, úıde saqtaýly tur. Al, ekinshisin Bishkekten aldyrǵan.
«Qazaqstannan tappadym. Sodan ulttyq aspaptar satatyn dúkenge tapsyrys berip, Qyrǵyzstannan aldyrdym. Qazir sonymen án aıtyp júrmin. Al, eski mandolınimniń orny bólek. 14 jasymda Shámshi Qaldaıaqovtyń aldynda án aıttym. Sol kezde mandolındi surap alǵan Shámshi atamyz da sonymen án aıtty. „Bul mandolındi men syılamasam da, menen alǵandaı etip ustap júr. Shámshi qolymen ustap, án aıtqan mandolın dep aıtyp júrersiń“, — dep batasyn berdi. Sondyqtan ony tórge ilip qoıdym», — deıdi ánshi áje.
Roza Seıitqasymovanyń repertýarynda án kóp. Barshasyn bir-eki oqyǵannan jattap alady.
Odan bólek, ánshi áje tek mandolınde ǵana emes, dombyra men gıtara da tartady. Bos ýaqytynda ul-qyzdary men nemerelerine án aıtyp beredi.
Qazir ol óńirde ózinen basqa mandolın tartýǵa áýes adamnyń joqtyǵyn ýaıymdaıdy.
«Úırenýge aýyldan 4-5 bala keletin. Biraz ýaqyttan soń, olar da kelýin qoıdy. Jalpy bul aspap umyt bolyp barady. Sondyqtan, qaıta jańǵyrtyp, keń kólemde nasıhattalsa, óıtkeni óner artyq bolmaıdy», — deıdi ánshi áje.
