Manchesterden X-XII ǵasyrlarda alǵash túrki tiline aýdarylǵan Quran tabyldy
ASTANA. KAZINFORM - Qoljazbalar jáne sırek kitaptar ulttyq ortalyǵynyń mamandary Ulybrıtanııadaǵy ǵylymı-zertteý ekspedıtsııasy aıasynda London, Oksford jáne Manchester qalalaryndaǵy kitaphanalar men arhıvterge, ǵylymı ortalyqtarǵa bardy. Mamandar 15 qoljazba men 500-ge jýyq arhıv qujatynyń kóshirmesin aldy.
Manchester qalasynan tabylǵan qundy qoljazbanyń biri — shamamen X-XII ǵasyrlarda alǵash túrki tiline aýdarylǵan qasıetti Quran kitaby.
Túrki tilindegi aýdarmasy Júsip Balasaǵunıdiń «Qutty bilik» tiline óte jaqyn. Kitaptyń túrki-ıslam mádenıeti úshin mańyzy zor.
Sondaı-aq mańyzdy qoljazbalardyń biri — arab tilinde bıblıografııalyq baǵytta jazylǵan ortaǵasyrlyq eńbek.
«Kıtáb maqalaat ár Rafııa fıı ýsýl ılm at-tabııa» (Tabıǵat ǵylymynyń negizderi jaıly joǵary maqalalar kitaby) kitabynda Ábý Nasyr ál Farabıdiń ómirbaıany men qoljazbalary týraly málimetter bar.
Eýropalyq zertteýshi ǵalym Karl Brokkelman óz eńbeginde qoljazba ál-Farabıge tıesili ekenin atap kórsetken.
Qazaqstandyq mamandardy Oksfordtyń Bodlıan kitaphanasynan HІ ǵasyrdaǵy parsy tarıhshysy Ábý Saıd Abd-ál-Haıı-Gardızıdiń «Zeın ál-ahbar» eńbegi qyzyqtyrdy.
Qoljazba 1049-1053 jyldar aralyǵynda jazylǵan.
Eńbekte 1032 jylǵa deıingi parsy (ıslamǵa deıingi) patshalardyń, Muhammed pen halıfalardyń, sondaı-aq Horasannyń 1041 jylǵa deıingi tarıhy qamtylǵan.
Úndistan, Azııanyń túrki taıpalary, orystar, grekter arasyndaǵy ǵylym, din, merekeler týraly taraýlar bar.
Atalǵan qoljazbanyń úzindilerin V. V. Bartold «Mońǵol shapqynshylyǵy dáýirindegi Túrkistan» jáne «1893-1894 jyldardaǵy Orta Azııaǵa sapar týraly esep» eńbekterinde qoldanǵan.
Ulttyq ortalyqtyń qyzmetkerleri men sheteldik ǵalymdar qoljazbalar men basqa da eńbekterge birlesken zertteýler júrgizýdi josparlap otyr.
