Mamyrda munaı ónimderin elektrondy bırjada satý qaıta jandanady

NUR-SULTAN. QazAqparat – Bırja komıteti elektrondy bırjadan janarmaı satyp alýshylarǵa qoıylǵan lımıttik shekteýlerdi alyp tastady, dep habarlaıdy QazAqparat tilshisi.

Bul týraly QR Energetıka vıtse-mınıstri Áset Maǵaýov Ortalyq kommýnıkatsııalar qyzmetinde ótken brıfıngide aıtty.

«Shynymen de byltyr aýyl sharýashylyǵy taýaryn óndirýshilerdi dızel otynymen qamtamasyz etýde qıyndyqtar týyndaǵan edi. Bul bir jaǵynan shekaralas aımaqtarda baǵanyń kúr ósýimen baılanysty bolǵan edi. Reseı naryǵynda dızel baǵasy lıtrine 300 teńgege deıin baratynyn bilesizder. Ózbekstanda byltyr dızeldiń 1 lıtri 350 teńgeiń mańaıynda boldy. Biz 1 lıtr dızeldiń baǵasyn 200 teńgeniń aınalasynda ustaýǵa tyrystyq. Sonyń saldarynan qolda bar janarmaı trnazıttik jolmen, kóleńkeli aǵystarmen syrtqa kete bastady. Tipti tıisti buıryqtardyń bolǵany da áser ete almady. Ol kezde «QazMunaıgaz», «PetroSan» sııaqty iri óńdeýshilerdiń baǵasy men aradaǵy deldaldardyń baǵasynyń arasynda úlken aıyrmashylyq bolǵan edi. Іri óńdeýshiler baǵany 210-212 myń teńge kóleminde saqtaýǵa tynysty. Al ajıotaj kezinde naryqta 1 tonna dızeldiń baǵasy 350 myń teńgege deıin jetti. Myna jaqtan Reseıdiń qymbat ımporty dep kelip jatty», - dedi mınıstrdiń orynbasary.

Aıtýynsha, osynyń kesirinen ortada tıimsiz jetkizýshiler paıda bolǵan.

«Olar 212 myń tegeden satyp alyp, naryqqa birden 300-350 myń teńgeden satpaqshy boldy. Bıyl sol jaǵdaıdyń qaıtalanýyna jol bermeý úshin munaı ónimderiniń aınalymy týraly zańnamaǵa túzetý usyndyq. Munaı ónimderiniń kóterme naryǵyna qatysý úshin jetkizýshiniń munaı bazasy bolý kerek. Saqtaıtyn oryny joqtar naryqtan alastatylady. Qazir kóterme baǵamen janarmaı jetkizýshiler munaı bazalarymen kelisimshart jasaý arqyly ǵana bul bıznespen aınalysa alady. ıAǵnı, jetkizýshilerdiń ortasy munaı bazalarynyń múmkindigimen shektelip otyr», - degen vedomstvo ókili kóterme naryqqa janarmaı jetkizýshilerdiń kiris mólsherin bekitýdi usynǵandaryn aıtady.

Sonymen qatar ol munaı ónimderin elektrondyq bırjada satýdy qaıta bastaý da usynylǵanyn jetkizdi.

«Byltyr sáýir aıynda benzın men dızeldi osy alańda belsendi satqan edik. Biraq tıisti lımıtter bolǵan. Satyp alýshy retinde bırjaǵa kirý quqyǵyn alǵandardyń sany shekteýli boldy. Óıtkeni mundaı saýda pılottyq joba boıynsha bastalǵan edi. Sáıkesinshe jyldyq kólemi 20 myń tonnadan az jetkizýshiler qatysa alǵan joq. Jyl ortasynda bul lımıtti 5 myń tonnaǵa deıin túsirdik. Bırja komıtetiniń sheshimimen bir aı buryn bul lımıttiń kúshi joıyldy. Bul ózgeris usaq janarmaı stansalaryna elektrondy bırjaǵa kirýge múmkinidik beredi. Osylaısha eshbir deldalsyz, qajetti kqlemdi tikele satyp alady. Mamyr aıynda bırjada satý qaıta jandanady», - dedi Áset Maǵaýov.

Atalǵan sharada mınıstrdiń orynbasary munaı óńdeý zaýyttary egiske qajet dızeldiń bir lıtrin 176 teńgeden satatynyn aıtqan bolatyn.