Mamyrda qazaqstandyq loýkoster Astanadan Ankaraǵa bılet satýdy bastaıdy

ASTANA. QazAqparat – FlyArystan Astana men Ankara arasynda qatynaıtyn ushaqtarǵa bılet qashan satyla bastaıtynyn málim etti, dep habarlaıdy QazAqparat tilshisi.

Túrkııa men Qazaqstan astanalarynyń arasyn jalǵaıtyn bıýdjettik reıske bıletter 23 mamyrdan bastap satylýy múmkin. Reıs aptanyń seısenbi jáne senbi kúnderi saǵat 5.00 shamasynda ushady dep josparlanǵan. Loýkoster taratqan resmı málimette bılettiń bir baǵyttaǵy quny 43560 teńge kóleminde bolatyny da aıtylǵan.

«2021 jyly Túrkııa FlyArystan jelisindegi alǵashqy halyqaralyq baǵyt boldy. Eki jyl ishinde Stambýl qazaqstandyqtardyń súıikti baǵytyna aınaldy. Sol sııaqty Ankara da týrıster men kásipkerler úshin suranysqa ıe baǵytqa aınalady dep úmittenemiz. Kompanııa astanalyqtardan bólek Almaty, Shymkent, Semeı, Qyzylorda, Aqtaý jáne basqa da qalalardyń turǵyndaryna Túrkııa qoljetimdi reıs usynýǵa daıyn», - deıdi dedi marshrýttyq jelini josparlaý jónindegi dırektor Renat Ábilhanov.

Onyń aıtýyna qaraǵanda, Flyarystan-nyń halyqaralyq baǵyttaǵy birneshe reısi qaıta qalpyna keledi.

«Áýe kompanııasy flot ulǵaıǵandyqtan 2023 jyldyń basynan bastap Aqtaý – Erevan, Almaty – Samarqand sııaqty birqatar halyqaralyq baǵyttardy qalpyna keltirip, Almaty men Astanadan Óskemenge ushatyn baǵyt boıynsha bılet satýdy bastady», - dedi ol.

Air Astana ulttyq tasymaldaýshysynyń quramyndaǵy loýkoster 2023 jyldyń aıaǵyna deıin flot quramyn 19 ushaqqa jetkizbekshi.

Buǵan deıin Astana – Ankara arasynda tikeleı avıareıs ashylǵany týraly habarlaǵan bolatynbyz.