MÁMS-ke aılyǵy joǵary qazaqstandyqtardan 250 mlrd teńge túspeı jatyr

ASTANA. KAZINFORM – Qazir eldegi eń joǵary aılyq alatyn adamdar MÁMS-ke tabysynyń 0,4 paıyzyn ǵana tólep júr. Al aılyǵy 850 myń teńgege jetpeıtin ózge qazaqstandyqtar tabysynyń 2 paıyzyn MÁMS-ke aýdarady. «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń basqarma tóraǵasy Ábilqaıyr Sqaqov osy ádiletsizdik joıylsa, qorǵa qosymsha 250 mlrd teńge túsetinin aıtady.

Astanada ótken baspasóz máslıhatynda Á.Sqaqov MÁMS-ke jarna alynatyn aılyq somasynyń joǵarǵy shegin 850 myń teńgeden 4,5 mln teńgege kóterý máselesi qaralyp jatqanyn aıtty. Onyń sózinshe, osy shekteýdiń «arqasynda» aılyǵy 850 myń teńgeden asatyn 500 myń adam MÁMS-ke aılyǵynyń 2 paıyzyna jetpeıtin jarna aýdaryp júr. 

«Negizi ol MÁMS-ke jarna tóleıtin barlyq adamdardyń 7 paıyzy ǵana, 500 myń adam kóleminde. Eger joǵary shekti 850 myń teńgeden 4,5 mln teńgege deıin kótersek, qorǵa qosymsha 250 mlrd teńge túsedi degen esebimiz bar. 

Qazir respýblıka boıynsha eń joǵary aılyq alatyn adamdar tabysynyń 0,4 paıyzyn ǵana MÁMS-ke jarna retinde tólep otyr. Al basqa qazaqstandyqtar aılyǵynyń 2 paıyzyn tóleıdi. Eger osy usynys qoldaý tapsa, bul ádiletsizdik joıylatyn edi», - deıdi Ábilqaıyr Sqaqov.

Sondaı-aq, ol bul qosymsha aqshanyń qaıda jumsalatynyn da aıtty.

«Eger usynys qoldaý taýyp jatsa, paıda bolǵan 250 mlrd teńgeni medıtsınalyq kómekti qarjylandyrýǵa jumsalady. ıAǵnı, bul somanyń esebinen tabysy tómen qazaqstandyqtardy MÁMS-ten bosatý qarastyrylyp otyrǵan joq. Óıtkeni bizde jumyssyzdar men zeınetkerler, áleýmettik osal toptar onsyz da jeńildetilgen sanatqa engizilgen. Olardyń úlesi 60 paıyzdan asady. Onyń ústine MÁMS-tiń basty qaǵıdaty – ortaq jaýapkershilik. Sondyqtan bul 250 mlrd teńgeni medıtsınalyq kómekti qarjylandyrýǵa baǵyttaý kózdelip otyr», - dedi qor basshysy.