MÁMS aıasynda kimder tisin tegin emdete alady

PETROPAVL. QazAqparat – Mindetti áleýmettik medıtsınalyq saqtandyrý aıasynda kimderge tis emdeý protsedýralary tegin kórsetiledi? Bul suraqqa Áleýmettik medıtsınalyq saqtandyrý qory Soltústik Qazaqstan oblystyń fılıalynyń dırektory Larısa Gordeeva aıtyp berdi, dep habarlaıdy QazAqparat tilshisi.

«Áleýmettik medıtsınalyq saqtandyrý qory» KEAQ SQO fılıalynyń málimetinshe, bıyl tegin stomatologııalyq qyzmet kórsetý maqsatynda 26 emdeý mekemesimen kelisim-sharttar jasaldy. Sonyń ishinde 18-i memlekettik, qalǵany jekemenshik klınıkalar.

«Oblysta jáne elimizde stomatologııalyq kómek kórsetetin medıtsınalyq uıymdardyń tizimin fms.kz resmı saıtynan tabýǵa nemese emhananyń ózinen bilýge bolady. Tegin stomatologııalyq qyzmet alý úshin emhanadan joldama alýdyń qajeti joq. Eń bastysy, naýqas MÁMS-te stomatologııalyq kómek alýshylardyń sanatynda bolýy tıis nemese medıtsınalyq kórsetkishteri bolýy kerek», - deıdi fılıal dırektory Larısa Gordeeva.

Stomatologııalyq klınıkalar ambýlatorııalyq negizde konsýltatsııalyq-dıagnostıkalyq qyzmetter men manıpýlıatsııalardy usynady. Munda plomba salý, alyp tastaý sııaqty em-domdar bar.

«18 jasqa tolmaǵan balalar, júkti áıelder ǵana kúndelikti stomatologııalyq kútimdi ala alady. Qatty aýyrǵan kezde 10 sanattaǵy azamattarǵa, sonyń ishinde balalar men júkti áıelderge, zeınetkerlerge, múgedektigi bar azamattarǵa jáne olarǵa kútim jasaıtyn jumys istemeıtin adamdarǵa, sonyń ishinde múgedek balalarǵa nemese birinshi toptaǵy múgedekterge, áleýmettik mańyzy bar jáne juqpaly aýrýlary bar naýqastarǵa, kópbalaly analarǵa, ataýly áleýmettik kómek alýshylarǵa jáne t.b. tegin qyzmet kórsetiledi», - deıdi Larısa Gordeeva.