MÁMS aıasynda 800-den astam jasandy uryqtandyrý ádisi jasaldy
Áleýmettik medıtsınalyq saqtandyrý qory 2022 jyly 6,68 mlrd teńgege 7 000 EKU tsıklyn qarjylandyrýdy kózdedi.
І toqsanda 824,6 mln teńgege ekstrakorporaldyq uryqtandyrýdyń 835 rásimi oryndaldy. Bul aldyńǵy jyldarǵa qaraǵanda áldeqaıda kóp. 2020 jyldyń І toqsanynda – 59, 2021 jyldyń І toqsanynda - 526 tsıkl shyǵarylǵan.
Aıta ketý kerek, jylyna bir ret MÁMS boıynsha EKU protsedýrasynan tegin ótýge bolady. MÁMS júıesinde EKU júrgizý aldynda erli-zaıyptylardy tekserý kólemi kózdelgen tizbege sáıkes júzege asyrylady.
Áleýmettik medıtsınalyq saqtandyrý qorynan atap ótkendeı, ekstrakorporaldyq uryqtandyrý protsedýrasy - joǵary tehnologııalyq medıtsınalyq qyzmetterge jatady jáne qymbat turady. Buǵan deıin ol tegin medıtsınalyq kómektiń kepildik berilgen kólemi sheńberinde júrgizilgen bolatyn. Alaıda, qarjylandyrý kólemi az boldy, jylyna shamamen 900–1000 kvota bólindi. Al, 2021 jyly QR Prezıdenti Qasym-Jomart Toqaevtyń tapsyrmasy boıynsha Qazaqstanda «Ańsaǵan sábı» baǵdarlamasy júzege asyryla bastady. Bul kvota sanyn 7 esege – jylyna 7 000-ǵa deıin arttyrýǵa múmkindik berdi.
Elimizdiń 9 óńirinde 19 medıtsınalyq uıym (onyń 18-i – jekemenshik) EKU protsedýrasyn atqarady. Patsıent klınıkany óz betinshe tańdaýǵa quqyly.
EKU-ǵa joldama alý úshin bekitilgen jeri boıynsha emhanaǵa júginý qajet. Densaýlyq saqtaý uıymdary bedeýlikten zardap shegetin adamdardy dıspanserlik naýqastardyń elektrondyq tirkelimine engizedi. 12 aı ishinde bedeýliktiń sebepterin zerttep-qaraǵannan jáne anyqtaǵannan keıin beıindi mamannyń qorytyndysy negizinde patsıenttiń qujattary densaýlyq saqtaýdy memlekettik basqarýdyń jergilikti organdarynyń arnaýly komıssııasyna jiberiledi.
Protsedýranyń negizgi kórsetkishi - terapevtik túzetý múmkin emes bedeýlik. EKU rásiminen 18-42 jas aralyǵyndaǵy Qazaqstan azamattary óte alady. Olar Densaýlyq saqtaý mınıstrligi belgilegen medıtsınalyq parametrlerge sáıkes kelýi qajet.
Eske salsaq, Shymkentte ótken bedeýlik problemalaryna arnalǵan halyqaralyq konferentsııada Densaýlyq saqtaý mınıstri Ajar Ǵınııat «Ańsaǵan sábı» baǵdarlamasy aıasynda 1 myńnan astam sábı dúnıege kelgenin aıtqan edi.