MÁMS arqyly jeke klınıkada emdelý tártibi túsindirildi

ASTANA.KAZINFORM - Qazaqstanda mindetti áleýmettik medıtsınalyq saqtandyrý (MÁMS) júıesinde azamattardyń jeke klınıkalarda em alý múmkindigi keńeıdi. Bul jańalyqqa qatysty KEAQ basqarma tóraǵasynyń keńesshisi Zabıra Orazalıeva túsinikteme berdi.

- Qorda qyzmet kórsetetin 1913 medıtsınalyq uıymnyń 1215-i - jekemenshik, tek 704-i ǵana memlekettik medıtsınalyq mekeme. Emdelýshi úshin eń bastysy - ýchaskelik dárigerden joldama alý. Qalǵanyn dáriger men meıirbıke retteıdi, - dedi ol Jibek Joly telearnasyndaǵy «Bugin LIVE» baǵdarlamasynda.

Onyń aıtýynsha, ýchaskelik meıirbıkeler ár 14 kún saıyn jańaratyn qabyldaý kestesin qarap, qaı mamanda bos oryn baryn tekseredi. Eger tirkelgen emhanada qajetti tehnıka nemese maman bolmasa, patsıent avtomatty túrde qordyń tizimindegi basqa mekemege joldanady. Bul talap jeke jáne memlekettik klınıkalar úshin birdeı.

- Qor tizimine engen kez kelgen klınıkaǵa tirkelýge bolady. Kosmetologııalyq qyzmetterden basqa barlyq medıtsınalyq qyzmetter MÁMS paketine kiredi. Jeke de, memlekettik te klınıkalarǵa qoıylatyn talap birdeı: lıtsenzııa, sanıtarlyq ruqsattar, sertıfıkattalǵan mamandar jáne qajetti qural-jabdyq bolýy kerek, - dep túsindirdi Orazalıeva.

Sonymen qatar, Zabıra hanym patsıentterdiń emhana aýystyrý tártibin de naqtylady.

- Jylyna bir ret óz tańdaýy boıynsha jeke klınıkaǵa aýysýǵa múmkindik bar. Budan bólek, árbir azamat kez kelgen ýaqytta turǵylyqty jeri ózgerse nemese úıiniń janynda jańa klınıka ashylsa aýysa alady, - dedi ol.

Aıta keteıik, buǵan deıin Mınıstrlik MÁMS shyǵyny boıynsha derekterdi jarııalaýdy qarastyryp otyrǵanyn jazǵan edik.