Malshylarǵa qatysty jańa sheshimder ázirlenip jatyr
ASTANA. KAZINFORM – Qazaqstanda 2026–2030 jyldarǵa arnalǵan Mal sharýashylyǵyn damytý jónindegi keshendi jospar aıasynda mal sharýashylyǵy salasynda eńbek etip júrgen malshylar men shopandardyń zeınet jasyn tómendetý, jastardy aýylda ustap qalý jáne turǵyn úı máselesin sheshý kózdelgen.
«Aýyl – el besigi» degen uǵym bul joly zaman talabyna saı jańasha mánge ıe bolyp otyr. Memleket basshysynyń 2025 jylǵy 8 qyrkúıektegi Joldaýynda berilgen tapsyrmalarǵa sáıkes, Aýyl sharýashylyǵy mınıstrligi mal sharýashylyǵyn damytýǵa arnalǵan 2026–2030 jyldarǵa arnalǵan keshendi jospardy ázirlep otyr.
Qujatta malshylar men shopandardyń áleýmettik jaǵdaıyn jaqsartý, kadr tapshylyǵyn azaıtý jáne aýylda jumys isteýge yntalandyrý máseleleri qamtylǵan.
– Keshendi jospardaǵy eń ózekti bastamalardyń biri – malshylar men shopandar úshin zeınetkerlik jasty tómendetý. Aýyldaǵy aýyr eńbek pen tabıǵattyń qatal jaǵdaıyn eskere otyryp, atalǵan mamandyqtardy zııandy eńbek jaǵdaılarynda jumys isteıtin kásipter tizbesine engizý usynyldy. Bul bastama júzege asqan jaǵdaıda, keminde 7 jyl boıy zeınetaqy aýdarymdary bar azamattar 55 jasynda zeınetke shyǵý múmkindigine ıe bolady, – delingen redaktsııanyń resmı saýalyna bergen jaýabynda.
Sonymen qatar, vedomstvo áleýmettik qoldaý tek eńbek adamymen shektelmeıtinin málimdedi. Malshylar men shopandardyń balalary úshin áskerı qyzmetke shaqyrýdy keıinge qaldyrý máselesi de kún tártibine qoıylǵan.
Kadr tapshylyǵyn azaıtý maqsatynda mal sharýashylyǵy mamandyqtary boıynsha bilim alyp jatqan jastarǵa da erekshe nazar aýdarylmaq. Granttardy bólý kezinde aýyl sharýashylyǵy taýaryn óndirýshiler, jergilikti atqarýshy organdar jáne joǵary oqý oryndary arasyndaǵy úshjaqty kelisimder arqyly jeke kvota qarastyrý kózdelip otyr. Mundaı grant ıegerleri oqýyn aıaqtaǵan soń, keminde úsh jyl aýyldaǵy kásiporynda jumys isteýge mindetteledi.
Taǵy bir mańyzdy baǵyt – turǵyn úı máselesi. Aýylda, kentter men aýyldyq okrýgterde jaldamaly turǵyn úı salǵan jumys berýshilerge memlekettik qoldaý sharalaryn jetildirý josparlanyp otyr.
Aıta ketý kerek, atalǵan sharalar – ázirge keshendi jospardyń jobalyq bastamalary. Olardy iske asyrý úshin qarjylandyrý kózderi men tetikter jaýapty memlekettik organdarmen qosymsha pysyqtalady.
Qujatty daıyndaý úshin arnaıy Jumys toby qurylyp, onyń quramyna Parlament depýtattary, óńir ákimderiniń orynbasarlary, ǵalymdar, qarjy ınstıtýttarynyń, salalyq qaýymdastyqtar men «Atameken» Ulttyq kásipkerler palatasynyń ókilderi engizilgen. Qazirgi tańda jumys toby 10 otyrys ótkizip, salalyq birlestiktermen turaqty pikir almasyp keledi.
Aıta keteıik, buǵan deıin Qazaqstanda Mal ósirýshiler odaǵy qurylǵanyn jazǵan edik.