Maqtaraldaǵy kópir jaramsyz bolyp qaldy

TÚRKІSTAN. QazAqparat – Maqtaral aýdanyndaǵy Fırdaýsı men Jeńis aýyldarynyń arasyn jalǵaıtyn kópir jabyldy, dep habarlaıdy QazAqparat tilshisi.

Qos aýyldy jalǵaıtyn kópir naýryzda tolassyz jaýǵan jaýynnyń saldarynan jáne jer asty sýlarynyń kóterilýine baılanysty jaramsyz kúıge tústi. Tireýishteri men beton arasy ajyrap ketken. Kóliktiń júrýine qaýip tóndirip tur.

«Oqys oqıǵalardyń aldyn alý maqsatynda kólik quraldary ótpeýi úshin atalǵan kópirdiń jabylǵandyǵyn habarlaımyz». Maqtaral aýdandyq ákimdigi osyndaı málimdeme jasady.

Aıta keteıik, naýryzda toqtamaı jaýǵan jańbyr Maqtaral men Jetisaı aýdandarynyń turǵyndaryna qolaısyzdyq týdyrdy. Jaýyn-shashyn mólsheri 16 kúnde bir aılyq normadan 68%-ǵa deıin asyp tústi. Osylaısha qos aýdanda aýlalar men kóshelerdi sý alyp ketken bolatyn.