Maqta óńdeıtin zaýyttarǵa nege jeńildetilgen elektr tarıfi berilmeı otyr — Úkimet jaýaby
ASTANA. KAZINFORM — Premer-mınıstrdiń orynbasary Serik Jumanǵarın Májilis depýtattarynyń saýalyna joldaǵan jaýabynda maqta óńdeıtin zaýyttarǵa elektr qýatyn kóterme baǵamen berýge ne kedergi ekenin aıtty.
Depýtattyq saýalda Túrkistan oblysyndaǵy maqta óńdeıtin zaýyttardyń elektr qýatyn kóterme baǵamen tutynǵysy keletini aıtylǵan. Depýtattardyń málimeti boıynsha, maqtaý zaýyttary 2024 jyldyń basynan beri 1 KVt eletkr qýaty úshin 37 teńge tólep otyr. Al kóterme baǵany paıdalaný úshin bir táýlikte ortasha tutyný kórsetkishi keminde 1 MVt bolý kerek. Maqta óńdeıtin kásiporyndardyń táýliktik qýaty buǵan jetpeıtindikten, olar jeńildikten qaǵylyp otyr. Sol olqylyqty joıý úshin depýtattar shekti normany 1 MVt emes, 0,5 MVt-qa deıin tómendetýdi usynǵan.
Serik Jumanǵarın eletr qýatyn jeńildikpen tutyný múmkindigi nege alpaýyttarǵa ǵana usynylatynyn mynandaı ýájben túsindiredi.
«Máselen, elektr energııasynyń kóterme naryǵy elektr energııasyn tikeleı satyp alý ózderi úshin únemdi bolyp tabylatyn tutyný kólemi iri qatysýshylarǵa baǵyttalǵan. Іri tutynýshylar elektr energııasyna turaqty jáne boljamdy suranysty qamtamasyz etedi. Bul kóterme saýda naryǵynyń turaqtylyǵy men boljamdy jumysyna yqpal etedi. Mınımaldy shekti belgileý naryqty basqarýdyń ákimshilik kedergilerin azaıtady. Sebebi shaǵyn tutynýshylar basqarý protsesin edáýir qıyndatyp, naryq operatorlaryna júktemeni arttyrýy múmkin», — dep jazylǵan jaýapta.
Vıtse-premerdiń paıymdaýynsha, shaǵyn tutynýshylardy kóterme naryqqa kirgizse, qosymsha shyǵyndar kóbeıýi múmkin. Naqty aıtqanda, júıede kórsetiletin qyzmetterdiń aqysyn, elektr qýatymen qamtamasyz etý qyzmeti satyp alý jáne teńgerimdeýshi naryqtaǵy teńgerimsizdikterdi satyp alý-satý shyǵyndaryn tóleýge mindetti bolady.
«Elektr energııasynyń kóterme saýda naryǵyna qol jetkizý úshin keminde 1 MVt ortasha táýliktik tutynýdyń bolýy jónindegi talap energııa júıesiniń turaqty jáne tıimdi jumysyn qamtamasyz etýge, ákimshilik shyǵyndardy azaıtýǵa jáne elektr energııasynyń kóterme saýda naryǵynyń teńgerimdi jumys isteýi úshin jaǵdaı jasaýǵa baǵyttalǵan», — dep jazady Serik Jumanǵarın.
Eske salsaq, buǵan deıin Serik Jumanǵarın sharýalarǵa astyqty kepildikpen satyp alýǵa kómektesý kerek ekenin aıtqan edi.