Makron zaıyby týraly jalǵan málimdeme jasaǵan áıeldi sotqa berdi

ASTANA. KAZINFORM – Frantsııa prezıdenti Emmanýel Makron men zaıyby Brıjıt Makron bloger Kendıs Oýenske qarsy jala jabý týraly sotqa aryz berdi. Bul týraly BBC habarlady.

Aryz AQSh-tyń Delaver shtatyndaǵy sotqa joldanǵan. Onda Kendıs Oýens taratqan aqparat «sandyraqqa toly, jala jabýǵa negizdelgen jáne shyndyqtan múlde alshaq» dep sıpattalady.

Áleýmettik jelilerde mıllıondaǵan jazylýshysy bar Oýens buǵan deıin birneshe ret Brıjıt Makronnyń jynysyn aýystyrǵanyn málimdegen. Sondaı-aq ol «Brıjıtke aınalý» atty beınerolıkter serııasyn jarııalaǵan.

Atalǵan konspırologııalyq teorııa birneshe jyldan beri ınternette tarap júr. Onda Frantsııanyń birinshi hanymy Jan-Mıshel Trone esimimen dúnıege kelgen delinedi. Alaıda bul — Brıjıt Makronnyń aǵasynyń aty jáne teorııa naqty dálelderge negizdelmegen.

Makron jubynyń málimdeýinshe, olar advokattary arqyly Oýenske birneshe márte bul jalǵan aqparattan bas tartý týraly talap qoıǵan. Alaıda jaýap bolmaǵandyqtan, jaǵdaıdy sheshýdiń jalǵyz joly — sotqa júginý dep sheshken.

Aryz mazmunynda Oýens jalǵan málimdemelerin ádeıi jalǵastyryp, jappaı jala jabý naýqanyn bastaǵany jazylǵan. Sonymen qatar, ol Makron men Brıjıttiń týystyq baılanysy baryn, tipti Frantsııa prezıdenti retinde Makrondy Ortalyq barlaý basqarmasynyń sanany basqarý baǵdarlamasy arqyly tańdady dep málimdegen.

— Eger bul jala jabýdyń aıqyn mysaly bolmasa, onda ondaı mysal múlde joq, — dedi Makrondar otbasyn sotta qorǵaıtyn advokat Tom Kler.

Aıta keteıik, buǵan deıin Makron balalarǵa nelikten áleýmettik jelilerdi paıdalanýǵa tyıym salýdy usynǵanyn habarladyq.