Maǵzum Myrzaǵalıev Aqtóbe ekologııasyn jaqsartý jumysymen tanysty
Aqtóbe qalasyn lastaıtyn eń iri kásiporyn - Aqtóbe ferroqorytpa zaýyty. Lastaýshy óndiris oryndarynyń ishinde zaýyttyń úlesi - 50%. 2021 jyldyń aqpan aıynda kásiporyn keshendi ekologııalyq ruqsattama alyp, sonyń aıasynda óndiristi eń ozyq qoljetimdi tehnologııalarǵa kóshirý kózdelgen. Kásiporyn basshylyǵy qabyldanǵan baǵdarlama boıynsha tazartý fıltrin qoıyp, 2023 jylǵa deıin qatty qaldyqty 40% azaıtýdy josparlap otyr. Mınıstr Maǵzum Myrzaǵalıev zaýyt basshylyǵyna eń úzdik tehnologııalarǵa kóshý sharalaryn tezdetýdi tapsyrdy. Sonymen birge hromshpınel untaǵy qaldyqtarynyń ýtılızatsııasy máselesin sheshý qajettigin aıtty. Ekologııa mınıstri Aqtóbe hrom qosyndylary zaýytyna da baryp, jınalyp qalǵan qaldyqtardyń ýtılızatsııasy boıynsha shara qabyldaý qajettigin eskertti. Atap ótý kerek, zaýyt jańa tehnologııalardy qoldaný arqyly byltyr las shyǵaryndylardy 1,4 esege azaıtqan.
«2025 jylǵa deıin zaýyt emıssııany azaıtý úshin tolyǵymen jeńdik súzgilerdi qoıady. Bul jumysty múmkindiginshe tezdetý kerek», - dedi mınıstr.
Aqtóbe qalasynyń ekologııalyq jáne sanıtarlyq-epıdemıologııalyq ahýalyna tozyǵy jetken kárizdik tazartý stantsııasy keri áserin tıgizdi. Maǵzum Myrzaǵalıev «Aktobesu-energygroup» AQ-nyń jumysymen tanysyp, jańa stantsııa salý máselesin qozǵady.
«Problemany ýaqytsha sheshý úshin ákimdik tarapynan 420 mln teńge bólinip, hımııalyq reagentter arqyly qoqyspen kúres júrip jatyr. Atap ótý kerek, biz ótken jyly oblys ákimdigimen birge óńirdiń ekologııalyq problemalaryn keshendi sheshý boıynsha Jol kartasyn qabyldadyq. Qorshaǵan ortaǵa keltiriletin zııandy azaıtý jumystary sol jospar aıasynda júzege asýda», - dedi Maǵzum Myrzaǵalıev.
