MAEK-ti qoldaýǵa bólingen qarajatqa salyq salynbaıdy
ASTANA. KAZINFORM — Búgin Májilistiń jalpy otyrysynda «Salyq jáne bıýdjetke tólenetin basqa da mindetti tólemder týraly» Kodekske (Salyq kodeksi) kommýnaldyq menshiktegi energııa óndirýshi uıymdarǵa salyq salý máseleleri boıynsha tolyqtyrýlar engizý týraly» zańy eki oqylymda qaralyp, qabyldandy.
Zań jobasyn Parlament depýtattary memleket kórsetetin kómek aıasynda memlekettik sýbsıdııalar men granttardy, basqa da óteýsiz kómekti alýshy — kommýnaldyq menshiktegi jáne bir mezgilde elektr energııasyn, sýdy (dıstıllıatty), jylý energııasyn óndirý jónindegi qyzmetti júzege asyratyn energııa óndirýshi uıymnyń memlekettik sýbsıdııalardy tolyq ıgerýi maqsatynda ázirledi.
Atap aıtqanda, bul qujat aıasyndaǵy jeńildikter Mańǵystaý atom energetıkalyq kombınatyna (MAEK) qatysty bolady.
— Usynylyp otyrǵan zań jobasy kommýnaldyq energetıka salasyndaǵy fıskaldyq jáne ekonomıkalyq máseleler keshenin sheshý maqsatynda ázirlendi. Búginde elektr energııasyn, sý (dıstıllıat) jáne jylý óndirýmen bir mezgilde aınalysatyn kommýnaldyq energııa óndirýshi uıymǵa sýbsıdııa túrinde bólinetin memlekettik qoldaýdyń eleýli bóligi qaryzdardy óteý sııaqty maqsattarǵa jumsalýdyń ornyna, salyq tólemderi retinde qaıtadan bıýdjetke qaıtarylady. Máselen, osy jyldyń sońyna deıin qoldanylatyn QR Salyq kodeksiniń 226-baby 1-tarmaǵynyń 15-tarmaqshasyna sáıkes, salyq tóleýshiniń jıyntyq jyldyq kirisine barlyq tabys túrleri, onyń ishinde óteýsiz alynǵan múlik te qosylady. Atalǵan Salyq kodeksiniń 313-baby 1-tarmaǵyna sáıkes, salyq salynatyn tabys 20 paıyzdyq mólsherleme boıynsha korporatıvtik tabys salyǵyna jatady. Osyǵan baılanysty, 2024 jyly respýblıkalyq bıýdjetten atalǵan uıymǵa bólingen 5 mlrd teńge kólemindegi memlekettik qoldaý qarajaty kásiporynnyń tabysy retinde esepteledi jáne joǵaryda kórsetilgen normalarǵa sáıkes onyń 20 paıyzy, ıaǵnı 1 mlrd teńge korporatıvtik tabys salyǵy retinde qaıtadan memlekettik bıýdjetke aýdarylady, — dedi Májilis depýtaty Edil Jańbyrshın.
Onyń aıtýynsha, mundaı jaǵdaıda korporatıvtik tabys salyǵyn tóleý memleket bólgen qarjynyń is júzinde qaıta bıýdjetke qaıtarylýyna ákeledi. Bul kórsetiletin memlekettik qoldaýdyń tıimdiligin tómendetedi.
— Sonymen birge, bıýdjetten bólingen qarajat tek maqsatty túrde — kredıtorlyq bereshekti óteýge nemese kásiporyndy damytýǵa ǵana jumsalýy tıis ekenin atap ótken jón. Osy sebepterge baılanysty zań jobasyn ázirleýshiler alynǵan sýbsıdııalarǵa salyq salýdan bosatýdy usynyp otyr. Bul memleket tarapynan kórsetilgen qoldaý aıasynda bólingen qarjyny tolyq ıgerýge múmkindik beredi. Sonymen qatar, zań jobasynyń normalary tek elektr energııasyn, sý (dıstıllıat) jáne jylý óndirýdi qatar júzege asyratyn jáne kommýnaldyq menshikke jatatyn energııa óndirýshi uıymǵa ǵana qoldanylady. Atalǵan zań jobasy boıynsha Qazaqstan Respýblıkasy Úkimetiniń oń qorytyndysy bar, — dedi depýtat.
Eske salsaq, byltyr Úkimet basshysy Oljas Bektenov Aqtaýdaǵy MAEK-ti jóndeý jáne sý tuşytý zaýytyn jańǵyrtý jumystaryn tekserdi.