Madına Ábilqasymova nesıe alǵandardyń quqyǵyn qorǵaý sharalaryn atady
«Bankten qaryz jáne mıkrokredıt alǵan azamattardyń quqyqtaryn qorǵaý maqsatynda agenttik mynadaı is-sharalardy iske asyrdy. Birinshiden, merzimi ótken kredıtter boıynsha bereshektiń ósýin shekteý úshin osy jyldyń 1 qańtardan bastap bankterge jáne mıkroqarjy uıymdaryna jeke tulǵalardyń barlyq kepilsiz tutynýshylyq qaryzdary jáne mıkrokredıtteri boıynsha tóleý merzimi kúntizbelik 90 kún ótken soń turaqsyzdyq aıybyn jáne komıssııalar esepteýge zańnamalyq túrde tyıym salyndy», - dedi agenttik tóraıymy.
Onyń aıtýynsha, ekinshiden, qaryzdar boıynsha borysh júktemesin shekteý úshin agenttik kirisi eń tómen kúnkóris deńgeıinen tómen azamattarǵa, onyń ishinde ataýly áleýmettik kómek alýshylarǵa qaryzdar, sondaı-aq aı saıynǵy tólemderi qaryz alýshynyń ortasha aılyq kirisiniń 50 paıyzynan asatyn qaryzdar berýge tyıym salýdy engizdi. Úshinshiden, prýdentsııalyq talaptar aıasynda bankterdi kredıttik táýekelderi joǵary tutynýshylyq kepilsiz kredıtterdi berýde shekteý úshin tutynýshylyq kredıtter boıynsha bankterdiń menshikti kapıtalynyń jetkiliktiligine normatıvter kapıtaldy rezervteý normatıvterin 150-den 300 paıyzǵa deıin eki ese ulǵaıtý túrinde arttyryldy.
«Qaryzdar óteý kezinde qıyndyqqa tap bolǵan qaryz alýshylarǵa qoldaý kórsetý jáne problemalyq bereshekti retteý tetikterin jetildirý maqsatynda agenttik zańnamalyq aktilerge túzetýlerdiń qosymsha blogyn ázirledi. Bankterdiń qaryzdy qaıta qurylymdaýǵa qaryz alýshylardyń ótinishterin qaraýdyń mindetti rásimin engizý, boryshkerlerdi qaıta qurylymdaý jáne ońaltý talaptarynyń tizbesin keńeıtý, kepildi ótkizgen jaǵdaıda ıpotekalyq turǵyn úı qaryzy boıynsha ótelmegen bereshekti keshirý kózdeledi. Budan basqa, kapıtaldandyrylǵan merzimi ótken syıaqy somasyna syıaqylar esepteýge, onyń ishinde jańa qaryz bergen kezde esepteýge tyıym salýdy engizý qarastyrylady», - dedi Mádına Ábilqasymova.
Agenttik tóraıymynyń atap ótýinshe, túzetýler blogy Qazaqstan Respýblıkasy Prezıdentiniń Ákimshiliginde qaralýda.
«Ony Qazaqstan Respýblıkasy Parlamenti Májilisiniń depýtattary bastama jasaǵan «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda mıkroqarjylyq jáne kollektorlyq qyzmetti retteý máseleleri boıynsha ózgerister men tolyqtyrýlar engizý týraly» QR Zańynyń jobasyna engizý josparlanyp otyr», - dedi ol.
