Mádı Manatbek «Otandastar qorynyń» vıtse-prezıdenti boldy

ASTANA. QazAqparat - Belgili jýrnalıst Mádı Manatbek «Otandastar qory» memlekettik kommertsııalyq emes aktsıonerlik qoǵamynyń vıtse-prezıdenti boldy, dep habarlaıdy QazAqparat.

«Otandastar qory» AQ Úkimet qaýlysymen 2017 jyldyń qazanynda quryldy. Sheteldegi  jáne elge kóship kelgen aǵaıyndardy qoldaý maqsatynda osyndaı qor qurý týraly tapsyrmany Dúnıejúzi qazaqtarynyń V quryltaıynda Qazaqstan Prezıdenti Nursultan Nazarbaev júktegen bolatyn.

Qordyń jarǵylyq kapıtalyna memleket júz paıyz qatysady. Onyń memlekettik aktsııa paketiniń 50% ıelený jáne qoldaný quqyǵy QR Mádenıet jáne sport mınıstrligine berilse, qalǵan jartysy QR Syrtqy ister mınıstrligine bekitildi.

 M.Manatbek buǵan deıin otandyq mass-medıa salasynda túrli basshylyq laýazymdardy atqardy. Sońǵy jumys orny - «Qazaqstan» teleradıokorporatsııasy» AQ enshisindegi jáne «Qazaq radıosy», «Shalqar» ulttyq arnasy, «Astana», «Klassık» radıolaryn bir arnaǵa toǵystyrǵan «Qazaq radıolary» JShS-da bas dırektor. Bul qyzmette ol 2017 jyldyń aqpany - 2018 jyldyń qyrkúıegi aralyǵynda boldy.