Mádenıet jáne sport mınıstrligi memlekettik muraǵat qyzmetkerleriniń biliktiligin arttyrýdy qolǵa aldy
Bul týraly QR Mádenıet jáne sport mınıstrliginiń baspasóz qyzmeti habarlady.
Uıymdastyrýshylar atap ótkendeı, bul ýaqyt talabyna saı óz jumysyn jetildirý máselesin birinshi kezekke qoıǵan aýdandyq deńgeıdegi muraǵat isi qyzmetkerleriniń biliktiligin arttyrýǵa baǵyttalǵan alǵashqy shara.
Sertıfıkattardy tapsyrǵan Qazaq ǵylymı-zertteý mádenıet ınstıtýty bas dırektorynyń orynbasary Arlen Tólesh: «Bul shara memlekettik qyzmet sapasyn arttyrý boıynsha naqty tapsyrmalar kórsetilgen Elbasynyń «Bes ınstıtýtsıonaldyq reformany júzege asyrý baǵytyndaǵy 100 naqty qadam» Ult josparyn oryndaýǵa arnalyp otyr. Biz aýdandyq deńgeıden búkil respýblıkany qamtymaqpyz», - dep atap ótti.
Ol sondaı-aq, Qazaq ǵylymı-zertteý mádenıet ınstıtýty Qazaqstan Respýblıkasy Mádenıet jáne sport mınıstrligimen birlese respýblıkanyń qujat qyzmetteri men muraǵat uıymdarynyń qyzmetkerleri úshin aýdıovızýaldyq qujattama men ǵylymı-tehnıkalyq qujattamany saqtaý máseleleri boıynsha biliktilikti arttyrý kýrstaryn ótkizýdi josparlap otyrǵanyn jetkizdi.
Tyńdaýshylarǵa elimizdiń qujattamalyq murasyn saqtaý, paıdalaný jáne dáripteýdi qamtamasyz etýdiń kókeıkesti máseleleri boıynsha shyǵarmashylyq jáne tájirıbelik sabaqtardy qamtıtyn baǵdarlamalar usynylǵan. Kýrstardy respýblıkamyzdyń jetekshi muraǵatshylary men qujattanýshylary, joǵary bilikti mamandar, normatıvtik aktilerdiń, qujat júrgizý men muraǵat isi boıynsha oqýlyqtar men ádistemelik quraldardyń avtorlary júrgizdi.
Alǵashqy kezeńde Ońtústik Qazaqstan oblysy memlekettik muraǵattardyń basshylary men qyzmetkerleri kýrstan ótti. Semınar barysynda muraǵattyq saqtaýǵa qujattardy irikteý men qundylyqty saraptaý, qujattarǵa tıimdi ǵylymı-anyqtamalyq apparatty qoldaný, ázirleý ádistemesi men muraǵattyq qujattardy esepke alýdyń erekshelikteri, muraǵattyq qujattarǵa qol jetkizýdi qamtamasyz etýdiń zamanaýı problemalary, quqyqtyq baza men muraǵattarda qujattardy qoldanýdyń nysany, sondaı-aq muraǵat qyzmetin aqparattandyrý men avtomattandyrylǵan tehnologııalardy paıdalaný máseleleri qarastyryldy.
Kýrs tyńdaýshylary Ulttyq muraǵattyń, ortalyq memlekettik muraǵat, arheografııa jáne derektaný ulttyq ortalyǵynyń elektrondyq qorlarymen tanysty. Qatysýshylar dáristerge úlken qyzyǵýshylyq tanytyp, jumys barysynda týyndaıtyn máseleler boıynsha suraqtar qoıdy.
«Qazirgi tańda respýblıkamyzdyń memlekettik muraǵattarynda 3000-ǵa jýyq adam eńbektense, olardyń 2,5 paıyzynyń ǵana profıldik bilimi bar. Osyǵan baılanysty, Qazaqstan Respýblıkasy Mádenıet jáne sport mınıstrligi Qazaq ǵylymı-zertteý mádenıet ınstıtýty negizinde muraǵat salasynyń qyzmetkerleri úshin mamandandyrylǵan biliktilikti arttyrý kýrstaryn uıymdastyrdy. Mınıstrlik Búkilreseılik qujattaný jáne muraǵat isi ǵylymı-zertteý ınstıtýty, Belarýs qujattaný jáne muraǵat isi ǵylymı-zertteý ınstıtýtymen, sheteldik áriptestermen jetekshi lektorlardy tartý, birlese kýrs ótkizý jóninde ýaǵdalasty», - dep atap ótti muraǵat isi jáne qujattama departamentiniń dırektory Álııa Mustafına.
